மொபட் மீது லாரி மோதி முதியவர் பலி

லாரி மோதி முதியவர் பலி

கிருஷ்ணராயபுரம் அருகே உள்ள பிச்சம்பட்டியை சேர்ந்தவர் ரம்யா (வயது 38). அதே ஊரை சேர்ந்தவர் மகாமுனி (73). இவர்கள் 2 பேரும் ஒரு மொபட்டில் சித்தலவாயில் இருந்து கோவக்குளம் சாலையில் சென்று கொண்டிருந்தனர்.

கரூர் பிச்சம்பட்டி அருகே சென்று கொண்டிருந்தபோது, அந்த வழியாக வந்த டேங்கர் லாரி ஒன்று, எதிர்பாராத விதமாக ரம்யா, மகாமுனி வந்து கொண்டிருந்த மொபட் மீது மோதியது. இதில் பலத்த காயம் அடைந்த மகாமுனி சம்பவ இடத்திலேயே பரிதாபமாக இறந்தார். ரம்யா படுகாயம் அடைந்தார்.

வழக்கு

இந்த சம்பவம் குறித்து தகவல் அறிந்த மாயனூர் போலீசார் சம்பவ இடத்திற்கு வந்தனர். பின்னர் படுகாயம் அடைந்த ரம்யாவை மீட்டு சிகிச்சைக்காக கரூரில் உள்ள ஒரு தனியார் மருத்துவமனைக்கு அனுப்பி வைத்தனர்.

மகாமுனியின் உடலை கைப்பற்றி பிரேத பரிசோதனைக்காக கரூர் அரசு மருத்துவமனைக்கு அனுப்பி வைத்தனர். இந்த விபத்து குறித்து மாயனூர் போலீசார் வழக்குப்பதிந்து விசாரணை நடத்தி வருகின்றனர்.