காளை முட்டி முதியவர் பலி

தோகைமலை அருகே உள்ள கொக்க கவுண்டன்பட்டியை சேர்ந்தவர் ராசு (வயது 70). இவர் தனது வீட்டில் வளர்த்து வரும் காளைக்கு நேற்று முன்தினம் தண்ணீர் வைக்க அருகே சென்றுள்ளார். அப்போது காளை எதிர்பாராத விதமாக ராசுவின் இடுப்பு பகுதியில் முட்டியது. இதில் படுகாயம் அடைந்த அவரை அங்கிருந்தவர்கள் மீட்டு சிகிச்சைக்காக 108 ஆம்புலன்ஸ் மூலம் திருச்சி அரசு மருத்துவமனைக்கு அனுப்பி வைத்தனர். இந்தநிலையில் சிகிச்சை பலனின்றி நேற்று ராசு பரிதாபமாக இறந்தார். இதுகுறித்து ராசுவின் மனைவி சிறும்பாயி கொடுத்த புகாரின்பேரில் தோகைமலை போலீஸ் இன்ஸ்பெக்டர் ராஜ்குமார் வழக்குப்பதிந்து விசாரணை நடத்தி வருகிறார்.