குளத்தில் மூழ்கி மூதாட்டி பலி

அழுகிய நிலையில் பிணம்

வடமதுரையை அடுத்த பெரியக்கோட்டை அருகே பி.குரும்பப்பட்டியில் ஒல்லிசெட்டி குளம் உள்ளது. இந்த குளத்தில் சுமார் 60 வயது மூதாட்டியின் உடல் அழுகிய நிலையில் பிணமாக மிதந்தது.

இதனைக்கண்ட அப்பகுதி மக்கள், இதுகுறித்து வடமதுரை போலீஸ் நிலையத்துக்கு தகவல் தெரிவித்தனர். அதன்பேரில் போலீஸ் சப்-இன்ஸ்பெக்டர் கார்த்திகேயன் தலைமையிலான போலீசாா் சம்பவ இடத்துக்கு விரைந்தனர்.

பின்னர் மூதாட்டியின் உடலை கைப்பற்றி பிரேத பரிசோதனைக்காக திண்டுக்கல் அரசு ஆஸ்பத்திரிக்கு அனுப்பி வைத்தனர். மேலும் இது தொடர்பாக போலீசார் வழக்குப்பதிவு செய்து விசாரணை நடத்தினர்.

குளத்தில் மூழ்கி பலி

விசாரணையில் அவர், பி.குரும்பப்பட்டியை சேர்ந்த காளியப்பன் மனைவி வீரம்மாள் (வயது 65) என்பது தெரியவந்தது. கடந்த ஒரு வருடத்துக்கு முன்பு வீரம்மாளின் கணவர் காளியப்பன் இறந்துவிட்டார்.

அதன்பிறகு தனது மகன் மாரியப்பன் (46) என்பவருடன் வசித்து வந்தார். கடந்த 25-ந்தேதி வீரம்மாள் திடீரென மாயமானார். இதனையடுத்து அவருடைய குடும்பத்தினர் பல்வேறு இடங்களில் தேடி பார்த்தனர்.

ஆனால் அவர் எங்கு சென்றார் என்று கண்டுபிடிக்க முடியவில்லை. இந்த நிலையில் நேற்று காலை அதே பகுதியில் உள்ள குளத்தில் வீரம்மாள் பிணமாக கிடந்தார். வீட்டில் இருந்து வெளியேறிய வீரம்மாள், குளத்தில் தவறி விழுந்து இறந்து இருக்கலாம் என்ற கோணத்தில் போலீசார் விசாரணை நடத்தி வருகின்றனர்.