பிரதோஷத்தை முன்னிட்டுகோவில்களில் சிறப்பு வழிபாடு

பிரதோஷ பூஜை

பிரதோஷத்தையொட்டி தேனி மாவட்டத்தில் உள்ள கோவில்களில் சிறப்பு வழிபாடு நடந்தது. அதன்படி, பெரியகுளம் அருகே ஈச்சமலை பகுதியில் உள்ள மகாலட்சுமி கோவிலில் தை மாத பிரதோஷத்தையொட்டி சிறப்பு வழிபாடுகள் நடைபெற்றன. இதையொட்டி, சிவன், நந்தீஸ்வரர், மகாலட்சுமிக்கு சிறப்பு அபிஷேகம் மற்றும் பூஜைகள் நடைபெற்றது. நந்திகேஸ்வரருக்கு பால், பன்னீர், கரும்புச்சாறு, மஞ்சள் உள்ளிட்ட பல்வேறு பொருட்களால் அபிஷேகங்கள் செய்யப்பட்டது. பக்தர்கள் பலர் கலந்துகொண்டு சாமி தரிசனம் செய்தனர். முடிவில் பக்தர்களுக்கு பிரசாதம் வழங்கப்பட்டது.

பெரியகுளம் அருகே கைலாசப்பட்டி பகுதியில் உள்ள கைலாசநாதர் மலைக் கோவிலில் பிரதோஷ வழிபாடு நடைபெற்றது. இதனையொட்டி நந்திகேஸ்வரர், கைலாசநாதருக்கு அபிஷேகம் மற்றும் சிறப்பு வழிபாடு நடைபெற்றது. பெரியகுளம் பாலசுப்ரமணிய சுவாமி கோவில், காளஹஸ்தீஸ்வரர் கோவில், தென்கரை காளியம்மன் கோவில் உள்ளிட்ட சிவன் கோவில்களிலும் சிறப்பு பூஜை நடந்தது.

சிறப்பு வழிபாடு

பிரதோஷத்தையொட்டி, போடி பழைய பஸ் நிலையம் அருகே உள்ள ஸ்ரீ கொண்டரங்கி மல்லையப்ப சுவாமி கோவிலில் சிவ பெருமானுக்கு சிறப்பு அபிஷேகம் செய்து பூஜை நடைபெற்றது. இதில் சிவ பெருமானுக்கு வெற்றிலையை கொண்டு சிறப்பு அலங்காரம் செய்யப்பட்டிருந்தது. பூஜையில் ஏராளமான பக்தர்கள் கலந்து கொண்டு சாமி தரிசனம் செய்தனர்.

இதேபோல், சுப்பிரமணிய சுவாமி கோவில், பிச்சாங்கரை மேலசொக்கநாதர் மற்றும் கீழசொக்கநாதர் கோவில், வினோபாஜி காலனி மீனாட்சி சுந்தரேஸ்வரர் கோவில் ஆகிய கோவில்களில் நேற்று மாலை சிவ பெருமானுக்கு சிறப்பு வழிபாடு நடைபெற்றது.