விபத்தில் ஒருவர் பலி

காரியாபட்டி,

திருச்சுழியை சேர்ந்த இளங்கோவன் (வயது 39) என்பவர் காரியாபட்டியிலிருந்து திருச்சுழிக்கு தனது மோட்டார் சைக்கிளில் சென்று கொண்டு இருந்தார். அப்போது எம்.ரெட்டியபட்டியைச் சேர்ந்த முத்துக்குமார் என்பவர் தனது மனைவி சுவேதாவை ஏற்றிக்கொண்டு அகத்தாகுளத்தில் இருந்து மதுரைக்கு சென்று கொண்டு இருந்தார். அப்போது இளங்கோவன் சென்ற மோட்டார் சைக்கிள் மீது மோதியதில் இளங்கோவன், முத்துக்குமார் உள்பட 3 பேர் படுகாயம் அடைந்தனர். இதுகுறித்து தகவல் அறிந்த காரியாபட்டி போலீசார் சம்பவ இடத்திற்கு விரைந்து சென்று படுகாயம் அடைந்தவர்களை மீட்டு காரியாபட்டி அரசு மருத்துவமனைக்கு சிகிச்சைக்காக சேர்த்தனர். அங்கு அவர்களுக்கு முதலுதவி சிகிச்சை அளிக்கப்பட்டது. பின்னர் மேல் சிகிச்சைக்காக மதுரை அரசு ராஜாஜி மருத்துவமனைக்கு இளங்கோவனை அனுப்பி வைத்தனர். மருத்துவமனைக்கு செல்லும் போது இளங்கோவன் பரிதாபமாக உயிரிழந்தார். மேலும் படுகாயமடைந்த சுவேதா மற்றும் முத்துக்குமார் ஆகியோர் அருப்புக்கோட்டை தனியார் மருத்துவமனையில் சிகிச்சை பெற்று வருகின்றனர். இந்த விபத்து குறித்து காரியாபட்டி போலீசார் வழக்குபதிவு செய்து விசாரணை நடத்தி வருகின்றனர்.