ஊட்டி லெவன் ஸ்டார் அணி வெற்றி

கோத்தகிரி

நீலகிரி மாவட்ட கால்பந்து சங்கத்தில் 44 அணிகள் பதிவு செய்துள்ளன. இந்த அணிகள் ஏ, பி, சி என 3 டிவிஷன்களாக பிரிக்கப்பட்டு லீக் போட்டிகளில் விளையாடி வருகின்றன. ஒவ்வொரு டிவிஷனிலும் சிறப்பாக விளையாடி அதிக புள்ளிகளை பெற்ற 2 அணிகள் தேர்வு செய்யப்பட்டு, பிரீமியர் லீக் போட்டிகளை நடத்த முடிவு செய்யப்பட்டது. இந்த போட்டியில் ஹார்வெஸ்டர்ஸ், லெவன் ஸ்டார், நீலகிரி காலேஜ் தாளூர், நீலகிரி ப்ளுஸ், ஹில்ஸ் கிங், நீலகிரி எப்.சி. ஆகிய 6 அணிகள் பங்கேற்கின்றன. இந்தநிலையில் நேற்று முதல் போட்டியில் நீலகிரி காலேஜ் அணியும், நீலகிரி எப்.சி. அணியும் விளையாடின. இதில் இரு அணிகளும் கோல்கள் எதுவும் போடவில்லை. இதனால் போட்டி டிராவில் முடிந்தது. மேலும் இரு அணிகளுக்கும் தலா ஒரு புள்ளி வழங்கப்பட்டது. தொடர்ந்து நடந்த 2-வது போட்டியில் ஊட்டி லெவன் ஸ்டார் அணியும், ஹில்ஸ் கிங் அணியும் மோதின. ஆட்டம் தொடங்கியது முதல் ஆதிக்கம் செலுத்தி சிறப்பாக விளையாடிய ஊட்டி லெவன் ஸ்டார் அணி 6 கோல்கள் போட்டது. ஹில்ஸ் கிங் அணியால் 2 கோல்கள் மட்டுமே திரும்ப போட முடிந்தது. இதனால் ஊட்டி லெவன் ஸ்டார் அணி 6-2 என்ற கோல்கள் கணக்கில் வெற்றி பெற்றது.