கோரிக்கைகளை வலியுறுத்தி வாயிற் கோரிக்கை முழக்க கூட்டம்

பெரம்பலூர்

பெரம்பலூர் மாவட்டத்தில் பிளஸ்-1 அரசு பொதுத்தேர்வு விடைத்தாள் திருத்தும் பணி பெரம்பலூர் தந்தை ஹேன்ஸ் ரோவர் மேல்நிலைப்பள்ளியில் நடைபெற்று வருகிறது. விடைத்தாள் திருத்தும் பணியில் ஆசிரியர்கள் மேற்கொண்டு வருகின்றனர். நேற்று பணியில் இருந்த தமிழ்நாடு பதவி உயர்வு பெற்ற முதுநிலை பட்டதாரி ஆசிரியர் சங்கத்தை சேர்ந்த ஆசிரியர்கள் இடைவெைளயின் போது கோரிக்கைகளை வலியுறுத்தி வாயிற் கோரிக்கை முழக்க கூட்டத்தில் ஈடுபட்டனர். இதற்கு சங்கத்தின் மாநில தலைவர் பொன்.செல்வராஜ் தலைமை தாங்கி, கோரிக்கைகளை விளக்கி பேசினார். மாவட்ட தலைவர் பிரபாகரன், மகளிரணி செயலாளர் கவிதா ஆகியோர் முன்னிலை வகித்தனர். கூட்டத்தில் கலந்து கொண்ட ஆசிரியர்கள் பழைய ஓய்வூதிய திட்டத்தை அமல்படுத்த வேண்டும். ஈட்டிய விடுப்பு ஒப்படைப்பை உடனடியாக வழங்க வேண்டும். மேல்நிலைப்பள்ளி தலைமை ஆசிரியர் பதவி உயர்வில், பதவி உயர்வு பெற்ற முதுநிலை பட்டதாரி ஆசிரியர்களுக்கு 50 சதவீத இட ஒதுக்கீடு வழங்க வேண்டும் என்பன உள்ளிட்ட கோரிக்கைகளை தமிழக அரசு நிறைவேற்ற வலியுறுத்தி கோஷங்களை எழுப்பினர். முன்னதாக சங்கத்தின் மாநில செய்தி மற்றும் தகவல் தொடர்பு செயலாளரும், மாவட்ட செயலாளருமான கமலகண்ணன் வரவேற்றார். முடிவில் மாவட்ட பொருளாளர் மணி நன்றி கூறினார்.