பாரா ஒலிம்பிக் வாலிபால் போட்டி தொடக்கம்

தேசிய பாரா ஒலிம்பிக் வாலிபால் கூட்டமைப்பு, மாநில பாரா வாலிபால் சங்கம், மாவட்ட வாலிபால் சங்கம் ஆகியவை இணைந்து நடத்தும் தேசிய அளவிலான பாரா ஒலிம்பிக் வாலிபால் சாம்பியன்ஷிப்-2023 போட்டி சிறுவாச்சூர் ஆல்மைட்டி வித்யாலயா பப்ளிக் பள்ளியில் நேற்று மாலை தொடங்கியது. வருவாய்கோட்டாட்சியர் நிறைமதி முன்னிலையில், பெரம்பலூர் மாவட்ட வருவாய் அலுவலர் அங்கையற்கண்ணி நிகழ்ச்சிக்கு தலைமை தாங்கி, போட்டியை தொடங்கி வைத்தார்.

சப்-ஜூனியர், ஜூனியர், சீனியர் என 3 பிரிவுகளில் போட்டிகள் நடைபெறுகிறது. இதில் ஜார்கண்ட், ராஜஸ்தான், தமிழ்நாடு, பாண்டிச்சேரி, கர்நாடகா, ஹரியானா, இமாசலபிரதேசம், தெலுங்கானா உட்பட 20 மாநிலங்களை சேர்ந்த 250-க்கும் மேற்பட்ட மாற்றுத்திறனாளி வீரர்கள் அடங்கிய அணிகள் கலந்து கொள்கின்றன. போட்டியில் வெற்றிப்பெற்ற அணிகளுக்கு பரிசளிப்பு விழா இன்று (சனிக்கிழமை) மாலை நடைபெறுகிறது. இதில் போக்குவரத்து துறை அமைச்சர் சிவசங்கர் கலந்துகொண்டு பரிசுகள் வழங்கவுள்ளார்.