சோமவாரப்பட்டி ஆல்கொண்டமால் கோவிலில் தமிழர் திருநாள் திருவிழாவை முன்னிட்டு ஆயிரக்கணக்கான பக்தர்கள் கலந்து கொண்டு சாமி தரிசனம் செய்தனர்.

குடிமங்கலம்

சோமவாரப்பட்டி ஆல்கொண்டமால் கோவிலில் தமிழர் திருநாள் திருவிழாவை முன்னிட்டு ஆயிரக்கணக்கான பக்தர்கள் கலந்து கொண்டு சாமி தரிசனம் செய்தனர்.

ஆல்கொண்டமால்

சோமவாரப்பட்டியில் ஆதிகாலத்தில் அடர்ந்த காடுகளில் விஷப் பாம்புகள் வாழும் ஆலமரத்தின் கீழ் சிவலிங்க வடிவில் ஒரு புற்று இருந்தது. இந்தப் பகுதியில் மேய்ந்த பசுக்கள் புற்றில் நிலையாகபாலை சுரந்து வந்தன.சுயம்பு மூர்த்தியாக எழுந்தருளியுள்ள எம்பெருமானுக்கு அபிஷேகம் செய்த பசுவானது பாம்பினால் தீண்டப்பட்டு பாதிக்கப்பட்ட போது அந்தப் பசுவின் உடம்பின் மீது ஏறிய ஆலகால விஷத்தினை மாயவன் உண்டு பசுவினை காப்பாற்றியதால் ஆல் கொண்டமால் எனவும் ஆலம் உண்ட சிவனை குறிக்கும் வகையில் சிவலிங்க வடிவபுற்றில் கண்ணன் குடி கொண்டதால் ஆல்கொண்டமால் எனவும் இக்கோவில் விளங்கி வருகிறது.

காவல் தெய்வம்

கால்நடைகளின் காவல் தெய்வமாக இக்கோவில் விளங்கி வருகிறது ஒவ்வொரு ஆண்டும் தமிழர் திருநாள் திருவிழாவின் போது கிராமபுறங்களில் இருந்து ஆயிரக்கணக்கான பக்தர்கள் மாட்டு வண்டிகளிலும் இருசக்கர வாகனங்களிலும் பேருந்துகளிலும் வந்து தரிசனம் செய்கின்றனர். கால்நடைகளுக்கு நோய் ஏற்படாமல் தடுக்கும் பொருட்டு கால்நடைகளின் உருவார பொம்மைகளை வைத்து வழிபாடு செய்தனர்.

கறவை பாலைகொண்டு வந்து ஆல்கொண்டமாலுக்கு அபிஷேகம் செய்து திருநீறும் தீர்த்தமும் பெற்று சென்றனர். தமிழர் திருநாள் திருவிழாவை முன்னிட்டு நேற்று ஆல்கொண்டமாலுக்கு சிறப்பு அலங்காரமும், பால் அபிஷேகமும், தீபாராதனையும் நடைபெற்றது. உடுமலை போலீஸ் சூப்பிரண்டு தேன்மொழி வேல் தலைமையில் போலீசார் பாதுகாப்பு பணியில் ஈடுபட்டனர். கோவில் திருவிழாவிற்காக சிறப்பு பஸ்கள் இயக்கப்பட்டன.