குரங்குகள் தொல்லையால் பொதுமக்கள் அவதி

திருக்கடையூர்:

திருக்கடையூர் பகுதியில் குரங்குகள் தொல்லையால் பொதுமக்கள் அவதி அடைந்து வருவதால், அவைகளை பிடித்து அப்புறப்படுத்த வேண்டும் என கோரிக்கை விடுத்துள்ளனர்.

சுற்றித்திரியும் குரங்குகள்

மயிலாடுதுறை மாவட்டம் திருக்கடையூர் ஊராட்சிக்குட்பட்ட சன்னதி வீதி, தெற்கு வீதி, மேலவீதி, கீழவீதி, வடக்கு மடவிளாகம், தெற்கு மடவிளாகம் உள்ளிட்ட பகுதிகளில் 30-க்கும் மேற்பட்ட குரங்குகள் சுற்றித்திரிகின்றன.

இந்த குரங்குகள் வீடுகளில்அரிசி, காய்கறி, பழங்களை தின்றும், சேதப்படுத்தியும் வருகின்றன.மேலும் கடைகளில் புகுந்து உணவு பொருட்களை சேதப்படுத்துக்கின்றன.அமிர்தகடேஸ்வரர் கோவிலுக்கு வரும் பக்தர்கள் மற்றும் குழந்தைகள், முதியவர்களை குரங்குகள் கடித்து வருகின்றன.

பொதுமக்கள் அவதி

குரங்குகள் தென்னை மரங்களில் ஏறி அதில் உள்ள தேங்காய்களை சேதப்படுத்துகின்றன. இதேபோல் மாங்காய், வாழை மரங்களில் ஏறி பழங்களை சேதப்படுத்துகின்றன. குரங்குகள் தொல்லையால் பொதுமக்கள் மற்றும் விவசாயிகள் அவதிப்பட்டு வருகின்றனர்.

திருக்கடையூர் ஊராட்சியில் சுற்றித்திரியும் குரங்குகளை சம்பந்தப்பட்ட அதிகாரிகள் கூண்டு வைத்து பிடித்து வனப்பகுதியில் விட வேண்டும் என பொதுமக்கள் கோரிக்கை விடுத்துள்ளனர்.