தர்மபுரியில் தமிழ்நாடு அரசின் சாதனை புகைப்பட கண்காட்சி-நாளை முதல் தொடங்கி 10 நாட்கள் நடக்கிறது

தர்மபுரி:

தமிழ்நாடு அரசின் சாதனைகள், அனைத்து துறை திட்டங்கள் குறித்த புகைப்பட கண்காட்சி தர்மபுரியில் நாளை (சனிக்கிழமை) முதல் தொடங்கி 10 நாட்கள் நடக்கிறது.

இதுதொடர்பாக தர்மபுரி மாவட்ட கலெக்டர் சாந்தி வெளியிட்டுள்ள செய்திக்குறிப்பில் கூறப்பட்டுள்ளதாவது:-

புகைப்பட கண்காட்சி

தமிழ்நாடு அரசின் சாதனைகள் மற்றும் திட்டங்கள் குறித்து விழிப்புணர்வு ஏற்படுத்தும் வகையில் 'ஓயா உழைப்பின் ஓராண்டு', 'தமிழரின் கனவுகளை தாங்கி' என்ற தலைப்பில் புகைப்பட கண்காட்சி மற்றும் விழிப்புணர்வு கலை நிகழ்ச்சிகள் தர்மபுரி இலக்கியம்பட்டி அரசு ஆண்கள் மேல்நிலைப்பள்ளி மைதானத்தில் நாளை (சனிக்கிழமை) முதல் தொடங்கி வருகிற 30-ந் தேதி வரை நடக்கிறது.

இந்த புகைப்பட கண்காட்சியை வேளாண்மை மற்றும் உழவர் நலத்துறை அமைச்சர் எம்.ஆர்.கே.பன்னீர்செல்வம் தொடங்கி வைத்து பார்வையிடுகிறார். இதில் எம்.பி.,எம்.எல்.ஏ.க்கள், அனைத்து துறை அதிகாரிகள், உள்ளாட்சி அமைப்புகளின் பிரதிநிதிகள் பங்கேற்கிறார்கள்.

திட்டங்கள்

தினமும் மாலை 5 மணி முதல் இரவு 8 மணி வரை இந்த கண்காட்சி மற்றும் கலை நிகழ்ச்சிகள் நடைபெறும்.

இதில் தமிழ்நாடு முதல்-அமைச்சர் கலந்து கொண்ட நிகழ்ச்சிகள், அரசின் சிறப்பு திட்டங்களான காலை உணவு திட்டம், கல்லூரி கனவு, புதுமைப் பெண், மக்களை தேடி மருத்துவம், இன்னுயிர் காப்போம் திட்டம், எண்ணும் எழுத்தும், இல்லம் தேடி கல்வி, நான் முதல்வன், பெண்களுக்கான இலவச பஸ் பயணம், நம்ம ஊரு சூப்பரு, மீண்டும் மஞ்சப்பை உள்ளிட்ட பல்வேறு திட்டங்கள், அரசு நலத்திட்ட உதவிகள் வழங்கும் நிகழ்ச்சி, அமைச்சர்கள் கலந்து கொண்ட நிகழ்ச்சிகள் தொடர்பான புகைப்படங்கள் உள்பட அரசின் பல்வேறு சாதனைகள் மற்றும் திட்டங்கள் குறித்த புகைப்படங்கள் இடம் பெற உள்ளன.

கலை நிகழ்ச்சிகள்

இந்த புகைப்பட கண்காட்சி நடைபெறும் நாட்களில் தினமும் பள்ளிக் கல்வித் துறை மற்றும் உயர் கல்வித் துறை சார்பில் மாணவ, மாணவிகள் பங்கேற்கும் கலை நிகழ்ச்சிகள், கலை பண்பாட்டு துறை மற்றும் சுற்றுலா துறையின் சார்பில் ஒயிலாட்டம், தப்பாட்டம், கரகாட்டம் மற்றும் கிராமிய கலை நிகழ்ச்சிகள் நடைபெற உள்ளது.

மகளிர் திட்டம் மற்றும் உணவு பாதுகாப்பு துறை சார்பில் மகளிர் சுய உதவி குழுக்களை கொண்டு சிறு தானியம் மற்றும் பல்சுவை உணவுடன் கூடிய அரங்குகள் அமைக்கப்பட உள்ளது. இந்த புகைப்பட கண்காட்சியை தர்மபுரி மாவட்டத்தை சேர்ந்த பொதுமக்கள் அனைவரும் பார்வையிட்டு பயன்பெறுமாறு கேட்டுக்கொள்ளப்படுகிறார்கள்.

இவ்வாறு அதில் கூறப்பட்டுள்ளது.