போலீஸ் பணிக்கு உடல் தகுதி தேர்வு

கோவை

கோவையில் போலீஸ் பணிக்கு உடல் தகுதி தேர்வு நேற்று நடைபெற்றது.

உடல் தகுதி தேர்வு

தமிழ்நாடு சீருடை பணியாளர்கள் தேர்வாணையம் மூலம் மாநிலம் முழுவதும் 3 ஆயிரத்து 552 பணியிடங்களுக்கு காவல்துறை, சிறைத்துறை மற்றும் தீயணைப்பு துறைக்கு ஆட்கள் தேர்வு நடத்தப்படுவதாக அறிவிப்பு வெளியிடப்பட்டது. இதையடுத்து கடந்த ஆண்டு ஜூன் மாதம் எழுத்து தேர்வு நடைபெற்றது. இந்த தேர்வில் தேர்ச்சி பெற்ற மேற்கு மண்டலத்தை சேர்ந்த 548 பெண்களுக்கும், 623 ஆண்களுக்கும் உடல் தகுதி தேர்வில் பங்கேற்க அழைப்பு விடுக்கப்பட்டு இருந்தது. அதன்படி பெண்கள் பிரிவில் 300 பேருக்கும், ஆண்கள் பிரிவில் 400 பேருக்கும் முதற்கட்டமாக நேற்று உடல் தகுதி தேர்வு நடைபெற்றது.

டி.ஐ.ஜி. ஆய்வு

அதில் பெண்கள் பிரிவில் 176 பேரும், ஆண்கள் பிரிவில் 400 பேரும் பங்கேற்றனர். ஆண்களுக்கு கோவை போலீஸ் பயிற்சி பள்ளி மைதானத்திலும், பெண்களுக்கு நேரு ஸ்டேடியத்திலும் உடல் தகுதி தேர்வு நடைபெற்றது. பெண்கள் பிரிவினருக்கு சான்றிதழ் சரிபார்த்தல், உயரம் சரிபார்த்தல், 400 மீட்டர் ஓட்டம் மற்றும் ஆண்கள் பிரிவினருக்கு சான்றிதழ் சரிபார்த்தல், உயரம் சரிபார்த்தல், மார்பளவு சரிபார்த்தல், 1,500 மீட்டர் ஓட்டம் நடைபெற்றது.

பெண்கள் பிரிவில் மீதமுள்ள 228 பேருக்கும், ஆண்கள் பிரிவில் மீதமுள்ள 223 பேருக்கும் இன்று (செவ்வாய்க்கிழமை) உடல் தகுதி தேர்வு நடைபெறுகிறது. இந்த தேர்வை மாநகர போலீஸ் கமிஷனர் பாலகிருஷ்ணன், டி.ஐ.ஜி. விஜயகுமார், மாவட்ட போலீஸ் சூப்பிரண்டு பத்ரி நாராயணன் மற்றும் போலீஸ் அதிகாரிகள் பார்வையிட்டு ஆய்வு செய்தனர்.