தம்பதியை தாக்கியவரை தடுத்த நாடக ஆசிரியர் அடித்துக்கொலை

போளூர்

ேபாளூர் அருகே தம்பதியை தாக்கிய டீக்கடைகாரரை தடுத்த நாடக ஆசிரியர் அடித்துக்கொலை செய்யப்பட்டார். இதுதொடர்பாக டீக்கடைக்காரரை போலீசார் கைது செய்தனர்.

தம்பதியை தாக்கினார்

திருவண்ணாமலை மாவட்டம் போளூர் அருகே பங்களாமேடு கூட்ரோட்டில் டீக்கடையை செங்குணம் கிராமத்தைச் சேர்ந்த முபினுதீன் (வயது 30) என்பவர் நடத்தி வருகிறார்.

இந்த நிலையில் நேற்று முன்தினம் இரவு 9.30 மணி அளவில் வேலூர் நோக்கி இருசக்கர வாகனத்தில் சென்ற தம்பதி பங்களாமேடு டீக்கடையில் டீ சாப்பிட்டனர்.

அவர்களிடம் டீக்கடைகாரர் முபினுதீன் தகராறு செய்து ‌தம்பதி இருவரையும் அடித்ததாக கூறப்படுகிறது.

இதனை பக்கத்தில் குடியிருக்கும் நாடக ஆசிரியர் தர்மலிங்கம் (75) என்பவர் பார்த்து ஓடி வந்து சண்டையை விளக்கி உள்ளார்.

சிகிச்சை பலனின்றி சாவு

அப்போது முபினுதீன் கையால் தர்மலிங்கத்தை தாக்கி உள்ளார். இதில் அவர் படுகாயம் அடைந்து மயங்கி விழுந்தார். உடனடியாக அக்கம்பக்கத்தில் உள்ளவர்கள் தர்மலிங்கத்தை மீட்டு போளூர் அரசு ஆஸ்பத்திரிக்கு அனுப்பி வைத்தனர்.

பின்னர் மேல்சிகிச்சைக்காக திருவண்ணாமலை அரசு ஆஸ்பத்திரியில் சேர்க்கப்பட்டார். அங்கு சிகிச்சை பலனின்றி நேற்று அதிகாலை அவர் உயிரிழந்தார்.

கைது

இதுகுறித்த புகாரின் பேரில் போளூர் போலீஸ் இன்ஸ்பெக்டர் ஜெயபிரகாஷ், சப்-இன்ஸ்பெக்டர் அய்யப்பன் ஆகியோர் வழக்குப்பதிவு செய்து, முபினுதீனை கைது செய்து விசாரணை நடத்தி வருகின்றனர்.