பிளஸ்-2 மாணவி தற்கொலை: பள்ளிக்கூடத்தில் சி.பி.சி.ஐ.டி. போலீசார் விசாரணை

தூத்துக்குடி,

ராமநாதபுரம் மாவட்டம் எஸ்.அண்டகுடி பகுதியைச் சேர்ந்தவர் ராமநாதன் மகள் வைத்தீஸ்வரி (வயது 17). இவர் தூத்துக்குடி மாவட்டம் சில்லாங்குளத்தில் உள்ள தனியார் மேல்நிலைப்பள்ளி விடுதியில் தங்கி இருந்து பிளஸ்-2 படித்து வந்தார்.

நேற்று முன்தினம் பள்ளிக்கூடத்தில் உள்ள கழிவறையில் வைத்தீஸ்வரி தூக்குப்போட்டு தற்கொலை செய்து கொண்டார். வைத்தீஸ்வரியின் சாவில் சந்தேகம் இருப்பதாக பெற்றோர் போலீசில் புகார் தெரிவித்தனர்.

அமைச்சர் விசாரணை

இந்த நிலையில் நேற்று அமைச்சர் கீதாஜீவன், மாவட்ட கலெக்டர் செந்தில்ராஜ், போலீஸ் சூப்பிரண்டு பாலாஜி சரவணன், கோவில்பட்டி உதவி கலெக்டர் மகாலட்சுமி மற்றும் அதிகாரிகள் மாணவியின் குடும்பத்தினரிடம் பேச்சுவார்த்தை நடத்தினர்.

அதில் பிரேத பரிசோதனை அறிக்கை வந்த பின்னர் தான் முடிவு எடுக்கப்படும். மாணவியின் மரணத்தில் சந்தேகம் இருந்தால் உரிய நடவடிக்கை மேற்கொள்ளப்படும் என்று தெரிவிக்கப்பட்டது.

பின்னர் வைத்தீஸ்வரி தற்கொலை செய்து கொண்ட இடத்தை அமைச்சர், அதிகாரிகள் நேரில் பார்வையிட்டனர்.

உடல் ஒப்படைப்பு

பின்னர் அமைச்சர் கீதாஜீவன் நிருபர்களிடம் கூறுகையில், 'மாணவி வைத்தீஸ்வரி மரணம் குறித்து சி.பி.சி.ஐ.டி. போலீஸ் விசாரணை நடத்த பரிந்துரைக்கப்படும். அந்த மாணவி எழுதிய கடிதம் ஒன்று கிடைத்ததாக தெரிகிறது. அது முறையாக காவல்துறை விசாரணையில் உள்ளது' என்றார். தொடர்ந்து மாணவியின் பெற்றோரை சந்தித்து அமைச்சர் ஆறுதல் கூறினார்.

இதனையடுத்து நேற்று மாலை 4 மணியளவில் கோவில்பட்டி அரசு ஆஸ்பத்திரியில் வைத்தீஸ்வரி உடல் பிரேத பரிசோதனை செய்யப்பட்டு அவருடைய பெற்றோரிடம் ஒப்படைக்கப்பட்டது.

சி.பி.சி.ஐ.டி. போலீசார் விசாரணை

மேலும், அமைச்சரின் அறிவிப்பை தொடர்ந்து பசுவந்தனை போலீசார் வழக்கு சம்பந்தமான ஆவணங்களை சி.பி.சி.ஐ.டி. போலீசாரிடம் ஒப்படைத்தனர்.

நேற்று மாலையே சி.பி.சி.ஐ.டி. போலீசார் பள்ளிக்கூட வளாகத்தை பார்வையிட்டு விசாரணை மேற்கொண்டனர்.