மோட்டார் சைக்கிள் விபத்தில் போலீஸ் சப்-இன்ஸ்பெக்டர் படுகாயம்

ஆம்பூர் டவுன் போலீஸ் சப்-இன்ஸ்பெக்டராக பணிபுரிந்து வருபவர் தங்கவேல் (வயது 50). இவர், நேற்று முன்தினம் இரவு பணியை முடித்துவிட்டு மோட்டார் சைக்கிளில் பள்ளிகொண்டா நோக்கி சென்றார். ஆம்பூரை அடுத்த வடபுதுப்பட்டு தேசிய நெடுஞ்சாலை வழியாக சென்ற போது ஒருவர் திடீரென சாலையை கடந்துள்ளார். இதனால் தங்கவேல் சென்ற மோட்டார் சைக்கிள் கட்டுப்பாட்டை இழந்து அவர் மீது மோதியது.

இதில் தங்கவேல் மற்றும் சாலையை கடக்க முயன்றவர் படுகாயம் அடைந்தனர். இதுகுறித்து தகவலறிந்த ஆம்பூர் தாலுகா போலீசார் சம்பவ இடத்திற்கு சென்று படுகாயம் அடைந்த சப்-இன்ஸ்பெக்டர் தங்கவேலை மீட்டு வேலூர் தனியார் மருத்துவமனையிலும், சாலையை கடக்க முயன்றவர் வேலூர் அரசு மருத்துவமனையிலும் சேர்க்கப்பட்டனர்.

இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.