போலீஸ்காரரின் தந்தை சடலமாக மீட்பு; போலீசார் விசாரணை

காரையூர் அருகே மேலத்தானியம் பெரிய கண்மாயில் முதியவர் ஒருவர் உடல் அழுகிய நிலையில் எழும்புக்கூடாக கிடந்துள்ளது. இதைக்கண்ட அப்பகுதி மக்கள் காரையூர் போலீஸ் நிலையத்திற்கு தகவல் தெரிவித்துள்ளனர். தகவலின் பேரில், சம்பவ இடத்திற்கு வந்த போலீசார் முதியவர் உடலை கைப்பற்றி விசாரணை நடத்தினர். விசாரணையில், பிணமாக கிடந்தவர் காயாம்பட்டியை சேர்ந்த ராமையா (வயது 70) என்பதும், இவர், கடந்த ஆண்டு நவம்பர் மாதம் 22-ந் தேதி சடையம்பட்டிக்கு சென்றவர் வீடு திரும்பவில்லை என்பதும், இதுகுறித்து 27-ந் தேதி காரையூர் போலீஸ் நிலையத்தில் புகார் அளிக்கப்பட்டதும் தெரியவந்தது. இதையடுத்து போலீசார் முதியவர் உடலை பிரேத பரிசோதனைக்காக புதுக்கோட்டை அரசு மருத்துவக்கல்லூரி மருத்துவமனைக்கு அனுப்பி வைத்து விசாரணை நடத்தி வருகின்றனர். பிணமாக கிடந்த முதியவர் இலுப்பூர் போலீஸ் நிலையத்தில் போலீஸ்காரராக பணியாற்றி வரும் ராதாகிருஷ்ணனின் தந்தை என்பது குறிப்பிடத்தக்கது.