ஆனி மாத பிரதோஷத்தையொட்டி சிவன் கோவில்களில் சிறப்பு பூஜை

பரமத்திவேலூர்:

ஆனி மாத பிரதோஷத்தையொட்டி பரமத்திவேலூர் பகுதியில் உள்ள சிவன் கோவில்களில் சிறப்பு பூஜை நடந்தது. பரமத்திவேலூர் வல்லப விநாயகர் கோவில் வளாகத்தில் உள்ள விசாலாட்சி சமேத விஸ்வேஸ்வரருக்கு பிரதோஷத்தையொட்டி சிறப்பு பூஜை, அபிஷேகம் செய்யப்பட்டது. இதைத்தொடர்ந்து சாமி சிறப்பு அலங்காரத்தில் பக்தர்களுக்கு அருள்பாலித்தார். இதில் பரமத்திவேலூரை சேர்ந்த பக்தர்கள் கலந்து கொண்டு சாமி தரிசனம் செய்தனர். இதேபோல் பரமத்திவேலூர் அருகே உள்ள பாண்டமங்கலம் புதிய காசி விஸ்வநாதர், நன்செய் இடையாறு திருவேலீஸ்வரர், மாவுரெட்டி பீமேஷ்வரர், பில்லூர் வீரட்டீஸ்வரர், பொத்தனூர் காசி விஸ்வநாதர், பேட்டை மீனாட்சி சுந்தரேஸ்வரர் மற்றும் எல்லையம்மன் கோவிலில் உள்ள ஏகாம்பரேஸ்வரர் ஆகியோருக்கும், நந்தி பகவானுக்கும் சிறப்பு பூஜைகள் செய்யப்பட்டன. இதில் அந்தந்த பகுதிகளை சேர்ந்த பக்தர்கள் திரளாக கலந்து கொண்டு சாமி தரிசனம் செய்தனர்.