அஞ்சல் துறை சார்பில் தேசிய அளவிலான கடிதம் எழுதும் போட்டி

ஈரோடு

அஞ்சல் துறை சார்பில் தேசிய அளவிலான கடிதம் எழுதும் போட்டி நடக்கிறது.

கடிதம் எழுதும் போட்டி

ஈரோடு முதுநிலை அஞ்சலக கண்காணிப்பாளர் கோபாலன் வெளியிட்டு உள்ள செய்திக்குறிப்பில் தெரிவித்து இருப்பதாவது:-

அஞ்சல் துறை சார்பில் தேசிய அளவிலான கடிதம் எழுதும் போட்டி நடைபெற உள்ளது. இதில், '2047-ல் இந்தியா ஒரு பார்வை' என்ற தலைப்பில் தமிழ், ஆங்கிலம், இந்தி ஆகிய மொழிகளில் ஏதேனும் ஒரு மொழியில் கடிதம் எழுதலாம். 18 வயதுக்கு உட்பட்டவர்களுக்கு உள்நாட்டு அஞ்சல் அட்டை பிரிவு (இன்லாண்ட் லெட்டர்), அஞ்சல் உறை பிரிவிலும் (என்வலப் லெட்டர்), இதேபோல் 18 வயதுக்கு மேற்பட்டவர்களுக்கு உள்நாட்டு அஞ்சல் அட்டை பிரிவு, அஞ்சல் உறை பிரிவிலும் என 4 பிரிவுகளில் போட்டிகள் நடக்கிறது.

இதில் ஏதாவது ஒன்றில் கடிதம் எழுதலாம். என்வலப் பிரிவில், 'ஏ4' அளவு வெள்ளை தாளில், 1,000 வார்த்தைகளுக்கு மிகாமலும், இன்லாண்ட் லெட்டர் பிரிவில், 500 வார்த்தைகளுக்கு மிகாமலும் கடிதம் எழுதி அனுப்ப வேண்டும். கையால் எழுதப்பட்ட கடிதங்கள் மட்டும் ஏற்கப்படும். எழுதப்பட்ட கடிதத்தை, 'முதன்மை அஞ்சல் துறை தலைவர், தமிழ்நாடு வட்டம், சென்னை 600 002' என்ற முகவரிக்கு, 'Dai Akhar' அஞ்சல் துறை கடித போட்டி202223 என குறிப்பிட்டு, அருகில் உள்ள தபால் அலுவலகங்களில் வழங்கலாம்.

பரிசு

கடிதங்களை வருகிற அக்டோபர் மாதம் 31-ந்தேதிக்குள் அனுப்ப வேண்டும். மாநில அளவில் ஒவ்வொரு பிரிவிலும் முதல் பரிசு ரூ.25 ஆயிரம், 2-ம் பரிசு ரூ.10ஆயிரம், 3-ம் பரிசு ரூ.5ஆயிரமும், தேசிய அளவில் வெற்றி பெறுபவர்களுக்கு முதல் பரிசு ரூ.50 ஆயிரம், 2-ம் பரிசு ரூ.25 ஆயிரம், 3-ம் பரிசு ரூ.10 ஆயிரமும் வழங்கப்பட உள்ளது.

போட்டியாளர்கள் தாங்கள் எழுதும் கடிதத்தில் 1-01-2022-ம் தேதியின்படி 18 வயதுக்கு கீழ் உடையவர்கள், 18 வயதுக்கு மேல் உடையவர்கள் என சான்றிதழ் இணைத்து அனுப்ப வேண்டும். மாநில அளவில் பரிசு பெறும் 3 கடிதங்களின் விவரங்கள் வருகிற டிசம்பர் மாதம் 25-ந்தேதி அறிவிக்கப்படும். அதைத்தொடர்ந்து தேசிய அளவிலான பரிசு பெறும் கடிதங்கள் அறிவிக்கப்படும்.

இவ்வாறு அவர் தெரிவித்துள்ளார்.