மாணவர்களுக்கு கலை-இலக்கிய போட்டி

மாணவர்களுக்கு கலை-இலக்கிய போட்டி

திருப்பூரில் நடைபெறவுள்ள புத்தகத் திருவிழாவை முன்னிட்டு, காங்கயத்தில் பள்ளி மாணவ, மாணவிகளுக்கு கலை-இலக்கியத் திறனாய்வு போட்டிகள் நேற்று நடைபெற்றது.

தமிழ்நாடு அரசின் திருப்பூர் மாவட்ட நிர்வாகம் சார்பில் 19-வது திருப்பூர் புத்தகத் திருவிழா- 2023, வரும் 27-ந் தேதி முதல் அடுத்த மாதம் (பிப்ரவரி) 5-ந் தேதி வரை திருப்பூர் மாநகரில் நடைபெறவுள்ளது. இதனை முன்னிட்டு பள்ளி மாணவர்களுக்கான கவிதை, ஓவியம், கட்டுரை உள்ளிட்ட கலை, இலக்கியப் போட்டிகள் காங்கயம், பழையகோட்டை சாலையில் உள்ள ஊராட்சி ஒன்றிய நடுநிலைப்பள்ளியில் நடைபெற்றது.

இதில் 1 முதல் 12-ம் வகுப்பு படிக்கும் மாணவ, மாணவிகள் 174 பேர் கலந்து கொண்டனர். போட்டியில் வெற்றி பெற்றவர்களுக்கு, திருப்பூரில் நடைபெறும் புத்தகத் திருவிழாவின் போது பரிசுகள் வழங்கப்படவுள்ளன. போட்டிக்கான ஏற்பாடுகளை தமிழ்நாடு ஆரம்பப்பள்ளி ஆசிரியர் கூட்டணியின் நிர்வாகி பிரபு செபாஸ்டியன் உள்ளிட்ட ஆசிரியர்கள் செய்திருந்தனர்.