பயிற்சி மருத்துவர்கள் 3-வது நாளாக தர்ணா

நெல்லை பாளையங்கோட்டையில் அரசு சித்த மருத்துவக்கல்லூரி மருத்துவமனை செயல்பட்டு வருகிறது. இங்கு 500-க்கும் மேற்பட்ட மாணவ-மாணவிகள் பயின்று வருகிறார்கள்.

இங்கு 4½ ஆண்டுகள் படிப்புக்கு பிறகு மாணவர்கள் ஓராண்டு பயிற்சி டாக்டர்களாக பணியாற்றி, நோயாளிகளுக்கு சிகிச்சை அளிக்கின்றனர்.

இதற்காக பயிற்சி டாக்டர்களுக்கு மாதந்தோறும் ஊக்கத்தொகை வழங்கப்பட்டு வந்தது. இந்த நிலையில் பயிற்சி டாக்டர்களுக்கு கடந்த 4 மாதங்களாக ஊக்கத்தொகை வழங்கப்படவில்லை என்று கூறப்படுகிறது.

இந்த நிலையில் தங்களுக்கு ஊக்கத்தொகையை உடனே வழங்க வேண்டும் என்று வலியுறுத்தி, பயிற்சி டாக்டர்கள் கடந்த 13-ந்தேதி தர்ணா போராட்டத்தில் ஈடுபட்டனர்.

இந்த நிலையில் நேற்று 3-வது நாளாக அரசு சித்த மருத்துவக்கல்லூரி முதல்வர் அறையின் முன்பாக தரையில் அமர்ந்து தர்ணா போராட்டத்தில் ஈடுபட்டனர். இதில் பயிற்சி டாக்டர்கள் கருப்பு பேட்ஜ் அணிந்து பங்கேற்றனர்.