சிவன் கோவில்களில் பிரதோஷ வழிபாடு

பெரம்பலூரில் உள்ள பிரசித்தி பெற்ற அகிலாண்டேஸ்வரி சமேத பிரம்மபுரீஸ்வரர் கோவிலில் சோமவார பிரதோஷ வழிபாடு நேற்று மாலை நடந்தது. இதனை முன்னிட்டு நந்திபெருமானுக்கும், மூலவருக்கும் பல்வேறு அபிஷேகங்கள் நடந்தன. இதைத்தொடர்ந்து வண்ண மலர்களால் அலங்காரமும், மகா தீபாராதனையும் நடந்தன. அபிஷேக-ஆராதனையை கோவில் அர்ச்சகர் கவுரிசங்கர் சிவாச்சாரியார் குழுவினர் நடத்தினர். இதில் தினவழிபாட்டு குழுவினர், இறைநெறிக்கழகத்தினர், தர்மபரிபாலன சங்கத்தினர், பிரதோஷ வழிபாட்டுக்குழுவினர் மற்றும் சிவனடியார்கள், பக்தர்கள் திரளாக கலந்து கொண்டு வழிபட்டனர்.