பிரதமர் நரேந்திரமோடி பிறந்தநாள் விழா

பிரதமர் நரேந்திரமோடியின் பிறந்தநாள் விழா திண்டுக்கல்லில் கிழக்கு மாவட்ட பா.ஜனதா சார்பில் கொண்டாடப்பட்டது. இதையொட்டி திண்டுக்கல் பஸ் நிலையத்தில் பயணிகளுக்கு கிழக்கு மாவட்ட தலைவர் தனபாலன் இனிப்பு வழங்கினார். மேலும் ஒய்.எம்.ஆர்.பட்டியில் உள்ள ஆரம்ப பள்ளியில் பயிலும் மாணவர்களுக்கு புத்தகப்பை, எழுது பொருட்களை வழங்கினார். மேலும் திண்டுக்கல் அரசு மருத்துவமனையில் சிகிச்சை பெறும் உள் நோயாளிகளுக்கு சிறுபான்மை அணி நகர தலைவர் ரூபன் தலைமையில் உணவு வழங்கப்பட்டது.

திண்டுக்கல்-நத்தம் சாலையில் பொன்னகரம் பகுதியில் பிரதமரின் பிறந்தநாளையொட்டி பொதுமக்களுக்கு அன்னதானம் வழங்கப்பட்டது. இதில் மாவட்ட செயலாளர் சபாபதி, ஒன்றிய செயலாளர் உள்ளிட்ட நிர்வாகிகள் கலந்து கொண்டனர். அதேபோல் பா.ஜனதா இளைஞர் அணி சார்பில் தாடிக்கொம்பில் ரத்த தான முகாம் நடைபெற்றது. இதற்கு மாவட்ட தலைவர் அன்புஹரிகரன் தலைமை தாங்கினார். இதில் இளைஞர் அணியினர் ஏராளமானோர் கலந்து கொண்டு ரத்த தானம் செய்தனர்.

வடமதுரை

மேலும் வேடப்பட்டி பகுதியில் பா.ஜனதா கொடி ஏற்றி பொதுமக்களுக்கு இனிப்பு வழங்கப்பட்டது. இதேபோல் பல்வேறு இடங்களில் நடைபெற்ற நிகழ்ச்சிகளில் மாவட்ட துணை தலைவர் மல்லிகா, பொருளாளர் மணிகண்டன், மாநில வர்த்தகப்பிரிவு செயலாளர் நாராயணசாமி உள்பட பலர் கலந்து கொண்டனர். கிழக்கு மாவட்ட சிவாஜி மன்றத்தின் பொறுப்பாளர் சரவணன் தலைமையில் தெற்குரதவீதியில் நடந்த நிகழ்ச்சியில் அனைவருக்கும் இனிப்பு வழங்கப்பட்டது. இதில் பொதுச்செயலாளர் காளிதாஸ் உள்பட பலர் கலந்து கொண்டனர்.

இதேபோல் பிரதமர் நரேந்திர மோடியின் பிறந்தநாளையொட்டி வடமதுரை மேற்கு ஒன்றிய பா.ஜ.க. சார்பில் வடமதுரையில் கட்சி கொடி ஏற்றி வைக்கப்பட்டது. அதையடுத்து வடமதுரை தனியார் மருத்துவமனையில் ரத்த தான முகாம் நடந்தது. இதில் பா.ஜ.க. நிர்வாகிகள், தொண்டர்கள் ஏராளமானோர் கலந்துகொண்டு ரத்த தானம் செய்தனர்.

அதைத்தொடர்ந்து பள்ளி மாணவர்களுக்கு நோட்டு, புத்தகம் மற்றும் உபகரணங்கள் வழங்கும் நிகழ்ச்சி நடைபெற்றது. இதற்கு பா.ஜ.க மாவட்ட துணை தலைவர் ரமா தலைமை தாங்கி மாணவ-மாணவிகளுக்கு நோட்டு, புத்தகங்களை வழங்கினார்.