பிரதமர் நரேந்திர மோடி அடுத்த மாதம் மீண்டும் தமிழகம் வருகை ?

சென்னை,

நாடாளுமன்ற தேர்தல் நெருங்கும் நிலையில், பிரதமர் மோடி நாடு முழுவதும் தீவிர சுற்றுப்பயணம் மேற்கொண்டு வருகிறார். அந்த வகையில், தமிழகத்திற்கு இந்த மாதத்தில் மட்டும் இரண்டு முறை சுற்றுப்பயணம் மேற்கொண்டார். இந்த நிலையில் பிரதமர் மோடி, அடுத்த மாதம் சென்னைக்கு வரவுள்ளதாக தகவல் வெளியாகியுள்ளது. சென்னை புறநகர் பகுதியில் நடைபெறும் பாஜக மாநிலத் தலைவர் அண்ணாமலையின் 'என் மண் என் மக்கள் ' நிறைவு விழாவில் பிரதமர் மோடி பங்கேற்க உள்ளதாக பாஜக வட்டாரங்கள் கூறுகின்றன.

அண்ணாமலை தனது பாத யாத்திரையை கடந்த ஆண்டு ராமேஸ்வரத்தில் தொடங்கினார். அண்ணாமலையின் பாத யாத்திரையை அமித்ஷா தொடங்கி வைத்தார். தமிழகம் முழுவதும் பல்வேறு கட்டமாக அண்ணாமலை நடைபயணம் மேற்கொண்டு வரும் நிலையில் பிப்ரவரி 2-வது வாரத்தில் அவரது யாத்திரை சென்னையில் நிறைவு பெறுகிறது.

சென்னை புறநகர் பகுதியில் நிறைவு விழாவை நடத்துவதற்காக பாஜக ஆயத்தமாகி வருவதாக கூறப்படுகிறது. யாத்திரை நிறைவு விழா மற்றும் மாநாடு நடைபெறும் இடம் விரைவில் இறுதி செய்யப்பட்டு, பிரதமர் மோடியின் வருகை குறித்த தகவல் அதிகாரபூர்வமாக அறிவிக்கப்படும் என்று பாஜகவினர் தரப்பில் சொல்லப்படுகிறது.