பேச்சுப்போட்டியில் வெற்றி பெற்ற மாணவர்களுக்கு பரிசு

தமிழ் வளர்ச்சித் துறை சார்பில் அம்பேத்கர், கலைஞர் கருணாநிதி பிறந்த நாளையொட்டி பள்ளி மாணவர்களுக்கிடையே மாவட்ட அளவில் நடத்தப்பட்ட பேச்சுப்போட்டியில் வெற்றிப் பெற்ற மாணவ, மாணவிகளுக்கு பரிசு வழங்கும் விழா கலெக்டர் அலுவலகத்தில் நடந்தது. கலெக்டர் பாஸ்கரபாண்டியன் தலைமை தாங்கி தலா 2 பேருக்கு முதல் பரிசு தலா ரூ.5ஆயிரமும், இரண்டாம் பரிசு தலா ரூ.3 ஆயிரமும், மூன்றாம் பரிசு தலா ரூ.2 ஆயிரமும், 4 மாணவர்களுக்கு சிறப்பு பரிசு என மொத்தம் 10 பேருக்கு காசோலை, பாராட்டு சான்றிதழ்களை வழங்கினார்.

இதேபோல் கல்லூரி மாணவர்களுக்கு மாவட்ட அளவில் நடத்தப்பட்ட பேச்சுப்போட்டியில் வெற்றிப் பெற்ற 6 கல்லூரி மாணவ, மாணவிகளுக்கு காசோலை, பாராட்டு சான்றிதழ்களையும் கலெக்டர் வழங்கினார்.

முன்னதாக மாநில அளவில் நடைபெற்ற பள்ளி மாணவர்களுக்கான பேச்சுப்போட்டியில் பங்கேற்று முதல் பரிசு பெற்ற பொன்னேரி அரசு மேல்நிலைப் பள்ளி மாணவன் வேல்முருகனுக்கு சால்வை அணிவித்து, புத்தகம் வழங்கி பாராட்டு தெரிவித்தார். நிகழ்ச்சியில் தமிழ் வளர்ச்சித்துறை உதவி இயக்குநர் நாகராசன், முதன்மை கல்வி அலுவலரின் நேர்முக உதவியாளர் ஜெயவேல் மற்றும் ஆசிரியர்கள் கலந்து கொண்டனர்.