சுடுகாட்டுக்கு பாதைவசதி வேண்டி பொதுமக்கள் மனு

வந்தவாசி

சுடுகாட்டுக்கு பாதைவசதி வேண்டி ஜமாபந்தியில் பெலகாம்பூண்டி கிராம மக்கள் மனு அளித்தனர்.

ஜமாபந்தி

வந்தவாசி ஜமாபந்தி நடந்து வருகிறது. மாவட்ட சமூக பாதுகாப்பு திட்ட தனித்துணை கலெக்டர் கோ.வெங்கடேசன் தலைமை தாங்கி பொதுமக்களிடம் இருந்து மனுக்களை பெற்று வருகிறார்.

அவரிடம் தேசூரை அடுத்த பெலகாம்பூண்டி கிராம மக்கள் சுடுகாட்டிற்கு பகுதிக்கு பாதை வேண்டியும், பஸ் நிறுத்தத்தில் நிழற்குடை வேண்டியும், பஸ் வசதி, சாலை வசதி கோரியும் மனுக்களை அளித்தனர்.

இதில் தாசில்தார் ராஜேந்திரன் மற்றும், விவசாய சங்கத்தினர் சிவராமன், கன்னியப்பன் மற்றும் கிராம மக்கள் உடன் இருந்தனர்.

கலெக்டர்

தண்டராம்பட்டு தாலுகா அலுவலகத்தில் நேற்று தானிப்பாடி உள் வட்டத்தைச் சார்ந்த தானிப்பாடி, செ. ஆண்டாப்பட்டு, டி.வேலூர், சின்னியம்பேட்டை, ரெட்டியா பாளையம், மலையனூர் செக்கடி, மோத்தக்கல், ஆத்திப்பாடி, புத்துர் செக்கடி, போந்தை, நாராயண குப்பம் உள்ளிட்ட கிராமங்களுக்கான ஜமாபந்தி நடைபெற்றது.

நிகழ்ச்சியில் கலெக்டர் பா.முருகேஷ் கலந்து கொண்டு பொதுமக்களிடம் மனுக்களை பெற்றுக்கொண்டார். இதில் தாசில்தார் அப்துல் ரகூப் துணை தாசில்தார் விஜயகுமார் வருவாய் ஆய்வாளர் யுவராணி மற்றும் அலுவலர்கள் கலந்து கொண்டனர்.

செங்கம்

செங்கம் தாலுகா அலுவலகத்தில் நேற்று இரண்டாம் நாளாக கலெக்டரின் நேர்முக உதவியாளர் (நிலம்) வ.தேன்மொழி தலைமையில் ஜமாபந்தி நடந்தது. அவரிடம் பாய்ச்சல், இறையூர் உள்வட்டத்திற்குட்பட்ட வருவாய் கிராமங்களான கரியமங்கலம், சொர்பனந்தல், புதுக்குளம், கோனாகுட்டை உள்ளிட்ட கிராம பகுதிகளில் இருந்து பொதுமக்கள் தங்களது கோரிக்கை மனுக்களை வழங்கினர்.இதில் தாசில்தார் முனுசாமி, சமூக பாதுகாப்பு திட்ட தாசில்தார் ரேணுகா, துணை தாசில்தார்கள் தமிழரசி, துரைராஜ் உள்பட பலர் கலந்து கொண்டனர்.

கீழ்பென்னாத்தூர்

கீழ்பென்னாத்தூர் தாலுகா அலுவலகத்தில் ஜமாபந்தி நடைபெற்று வருகிறது. 2-வது நாளான நேற்று சோமாசிபாடி வருவாய் உள் வட்டத்தை சேர்ந்த 25 கிராமங்களுக்கு ஜமாபந்தி நடந்தது. திருவண்ணாமலை வருவாய் கோட்ட அதிகாரி மந்தாகினி தலைமை தாங்கி பொதுமக்களிடமிருந்து 150-க்கும் மேற்பட்ட மனுக்களை பெற்றுக்கொண்டார். தாசில்தார் சாப்ஜான், சமூக பாதுகாப்பு திட்ட தனி தாசில்தார் பன்னீர்செல்வம், ஜமாபந்தி மேலாளர் முருகன் ஆகியோர் முன்னிலை வகித்தனர்.

நிகழ்ச்சியில் மண்டல துணை தாசில்தார் வேணுகோபால், தலைமையிடத்து துணைதாசில்தார் தனபால், வட்ட வழங்கல் அலுவலர் மஞ்சுநாதன், தேர்தல் பிரிவு துணை தாசில்தார் மாலதி உள்பட பலர் கலந்து கொண்டனர்.