புதுக்கோட்டை ராயல் ஸ்போர்ட்ஸ் கிளப் அணி சிவந்தி ஆதித்தனார் கோப்பையை வென்றது

அன்னவாசல்:

துப்பாக்கி சுடும் போட்டி

புதுக்கோட்டை மாவட்டம், அன்னவாசல் அருகே ஆவாரங்குடிப்பட்டியில் தமிழ்நாடு துப்பாக்கி சுடும் சங்கம் மற்றும் புதுக்கோட்டை ராயல் ஸ்போர்ட்ஸ் கிளப் சார்பில் 48-வது ஆண்டு மாநில அளவிலான துப்பாக்கி சுடும் போட்டி கடந்த 31-ந்தேதி தொடங்கியது.

இந்த போட்டியானது நேற்று வரை நடந்தது. முதல் நாள் தொடங்கிய போட்டியை அமைச்சர்கள் அன்பில் மகேஷ் பொய்யாமொழி, மெய்யநாதன் ஆகியோர் தொடங்கி வைத்தனர். இதில் தமிழகம் முழுவதும் இருந்து 150-க்கும் மேற்பட்ட துப்பாக்கி சுடும் பயிற்சி மையங்களில் இருந்து ஏராளமான வீரர்கள் கலந்து கொண்டனர்.

ராயல் ஸ்போர்ட்ஸ் கிளப்

இதில் சிங்கிள் டிராப், டபுள் டிராப், ஸ்கீட் ஆகிய 3 பிரிவுகளில் போட்டிகள் நடைபெற்றது. இதில் 100-க்கும் மேற்பட்ட வீரர்கள் கலந்து கொண்டு விளையாடினர். இதையடுத்து வெற்றி பெற்ற அணிகளுக்கு கோப்பைகளும், வீரர்களுக்கு பதக்கங்களும் வழங்கும் நிகழ்ச்சி நேற்று நடந்தது. இதில் புதுக்கோட்டை மாவட்ட ஊராட்சி முகமை திட்ட அலுவலர் கருப்பசாமி, புதுக்கோட்டை நகர்மன்ற தலைவர் திலகவதி செந்தில் ஆகியோர் கலந்து கொண்டு ஒட்டு மொத்த சாம்பியன் ஷிப் போட்டியில் வெற்றி பெற்ற புதுக்கோட்டை ராயல் ஸ்போர்ட்ஸ் கிளப் அணிக்கு சிவந்தி ஆதித்தனார் கோப்பையை வழங்கினர். தொடர்ந்து ராஜகோபால தொண்டைமான், பிரித்திவிராஜ் தொண்டைமான், ராதாநிரஞ்சனி, மன்னார்குடி எம்.எல்.ஏ. ராஜா உள்பட வெற்றி பெற்ற வீரர்களுக்கு பதக்கங்கள் வழங்கப்பட்டன. நிகழ்ச்சியில் சாருபாலா தொண்டைமான் உள்பட பலர் கலந்து கொண்டனர்.