புஞ்சைபுளியம்பட்டி வாரச்சந்தையில்ரூ.1½ கோடிக்கு கால்நடைகள் விற்பனை

புஞ்சைபுளியம்பட்டி வாரச்சந்தையில் ரூ.1½ கோடிக்கு கால்நடைகள் விற்பனையானது.

நாட்டு மாடு

புஞ்சைபுளியம்பட்டி கால்நடை சந்தை வாரந்தோறும் வியாழக்கிழமை கூடுகிறது. அதன்படி நேற்று சந்தை கூடியது. இதற்கு தமிழகத்தின் பல்வேறு மாவட்டங்களில் இருந்தும் கேரளா, கர்நாடகா உள்ளிட்ட வெளி மாநிலங்களில் இருந்தும் விவசாயிகள் மற்றும் வியாபாரிகள் ஆடு, மாடு உள்ளிட்ட கால்நடைகளை வாங்க விற்க வந்தனர்.

30 எருமைகள், 200 கலப்பின மாடுகள், 80 கன்றுக்குட்டிகள், 150 ஜெர்சி ரக மாடுகள் கொண்டு வரப்பட்டன. எருமைகள் ரூ.18 ஆயிரம் முதல் ரூ.35 ஆயிரம் வரையும், கருப்பு வெள்ளை மாடு ஒன்று ரூ.24 ஆயிரம் முதல் ரூ.42 ஆயிரம் வரையும், ஜெர்சி மாடு ஒன்று ரூ.22 ஆயிரம் முதல் ரூ.48 ஆயிரம் வரையும், சிந்து மாடு ஒன்று ரூ.16 ஆயிரம் முதல் ரூ.42 ஆயிரம் வரையும், நாட்டு மாடு ஒன்று ரூ.60 ஆயிரம் முதல் ரூ.72 ஆயிரம் வரையும் விற்பனையானது.

ரூ.1½ கோடிக்கு விற்பனை

வளர்ப்பு கன்றுக்குட்டிகள் ரூ.5 ஆயிரம் முதல் ரூ.14 ஆயிரம் வரை விற்பனையானது. அதேபோல் பல்வேறு பகுதிகளில் இருந்து 1000-க்கும் மேற்பட்ட ஆடுகள் விற்பனைக்கு கொண்டு வரப்பட்டன.

வெள்ளாடு ஒன்று ரூ.7 ஆயிரம் வரையும், செம்மறி ஆடுகள் ரூ.6 ஆயிரம் வரையும் விற்பனையானது. ஆடுகள் ரூ.50 லட்சத்துக்கும், மாடுகள் ரூ.1 கோடிக்கும் என மொத்தம் ரூ.1 கோடியே 50 லட்சத்துக்கு விற்பனையானது என வியாபாரிகள் தெரிவித்தனர்.