ஈரோடு-கோபியில் மழை

ஈரோடு மாநகர் பகுதியில் நேற்று காலை வெயில் கடுமையாக இருந்தது. இதை தொடர்ந்து மாலையில் வானில் கரு மேகங்கள் தோன்றின. இரவு 8 மணிக்கு சாரல் மழை பெய்ய தொடங்கியது. இந்த மழை சிறிது நேரத்தில் நின்றுவிட்டது. இதைத் தொடர்ந்து இரவு 10 மணிக்கு மழை பெய்ய தொடங்கியது. இந்த மழை இரவு 11 மணி வரை பெய்தது. அதன் பின்னரும் மழை தூறிக் கொண்டே இருந்தது. இதனால் மாநகர் பகுதியில் இரவில் குளிர்ந்த காற்று வீசியது.

இதேபோல் கோபியில் நேற்று காலை முதலே கடும் வெயில் சுட்டெரித்தது. இந்த நிலையில் மாலை 6.30 மணி முதல் வானத்தில் மேகங்கள் திரண்டன. பின்னர் இரவு 8 மணி அளவில் மழை பெய்ய தொடங்கியது. இரவு 8.40 மணி வரை மழை பெய்தது. கரட்டூர், மொடச்சூர், நாயக்கன்காடு, நல்லகவுண்டன்பாளையம் மற்றும் சுற்றுவட்டாரப் பகுதிகளில் லேசாக மழை தூறியது.