கும்மிடிப்பூண்டி அருகே மரத்தில் அழுகிய நிலையில் ஆண் பிணம் மீட்பு; தற்கொலையா? போலீசார் விசாரணை

திருவள்ளூர் மாவட்டம், கும்மிடிப்பூண்டி அடுத்த புதுகும்மிடிப்பூண்டி ஊராட்சியை சேர்ந்த பகுதி வண்ணாங்குளம். இங்கு கருவேல மரத்தில் ஆண் ஒருவர் அழுகிய நிலையில் தூக்கில் பிணமாக தொங்கி கொண்டிருப்பதாக நேற்று கும்மிடிப்பூண்டி சிப்காட் போலீசாருக்கு தகவல் வந்தது. இதனையடுத்து சப்-இன்ஸ்பெக்டர் சுரேஷ் தலைமையில் கும்மிடிப்பூண்டி சிப்காட் போலீசார் சம்பவ இடத்திற்கு நேரில் சென்று விசாரணை நடத்தினர்.இதில் சுமார் 45 வயது மதிக்கத்தக்க அந்த ஆண் தனது கைலியால் தூக்கிட்ட நிலையில் பிணமாக தொங்கிகொண்டிருந்தார். உடல் அழுகிய நிலையில் காணப்பட்டதால் சுமார் 1 வாரத்திற்கு முன்பு இந்த சம்பவம் நடைபெற்று இருக்கலாம் என கருதப்படுகிறது. தூக்கில் பிணமாக தொங்கியவர் யார்? எந்த ஊரைச்சேர்ந்தவர் என்பது தெரியவில்லை.இதுகுறித்து கும்மிடிப்பூண்டி சிப்காட் போலீசார் சந்தேக சாவாக வழக்கு பதிவு செய்து கொலையா? தற்கொலையா? என விசாரணை நடத்தி வருகின்றனர்.