கார் மீது மோட்டார் சைக்கிள் மோதி விவசாயி பலி

ஒரத்தநாடு;

ஒரத்தநாடு அருகே கார் மீது மோட்டார் சைக்கிள் மோதி விவசாயி இறந்தார்.

கார் மீது மோதியது

தஞ்சை மாவட்டம் பாபநாசம் பகுதியைச் சேர்ந்தவர் மதியழகன் (வயது 40). விவசாயி. இவர் கடந்த 27- ந்தேதி வீட்டிலிருந்து மோட்டார் சைக்கிளில் புறப்பட்டு, ஒரத்தநாட்டை அடுத்துள்ள நெய்வாசல் கிராமத்தில் உள்ள உறவினர் வீட்டுக்கு சென்று கொண்டிருந்தார். நெய்வாசல் சாலையில் வேகத்தடை அருகே மதியழகன் சென்ற போது அதே சாலையில் முன்னே சென்று கொண்டிருந்த கார் மீது மதியழகன் ஓட்டி சென்ற மோட்டார் சைக்கிள் மோதியது.

பரிதாப சாவு

இதில் படுகாயம் அடைந்த மதியழகனை அக்கம்பக்கத்தினர் மீட்டு தஞ்சை அரசு மருத்துவக் கல்லூரி ஆஸ்பத்திரியில் சிகிச்சைக்காக சேர்த்தனர். அங்கு சிகிச்சை பெற்று வந்த மதியழகன் சிகிச்சை பலனின்றி பரிதாபமாக இறந்தார். இதுகுறித்து ஒரத்தநாடு போலீசார் வழக்குப் பதிவு செய்து விசாரணை நடத்தி வருகின்றனர்.