மரத்தில் கார் மோதி பெண் உள்பட 2 பேர் பலி

கூத்தாநல்லூர்;

கூத்தாநல்லூர் அருகே மரத்தில் கார் மோதி பெண் உள்பட 2 பேர் உயிரிழந்தனர். 5 பேர் படுகாயமடைந்தனர்.

மரத்தில் கார் மோதியது

நாகை மாவட்டம் பெருங்கடம்பனூரைச் சேர்ந்த குடும்பத்தினர், மதுக்கூர் அருகே உள்ள கோவிலுக்கு சென்று விட்டு, மீண்டும் சொந்த ஊருக்கு செல்வதற்காக நேற்று முன் தினம் இரவு 12 மணியளவில், கூத்தாநல்லூர் வழியாக பெரும்கடம்பனூர் நோக்கி காரில் சென்று கொண்டிருந்தனர். அப்போது, கட்டுப்பாட்டை இழந்த கார், கூத்தாநல்லூர் அருகே உள்ள, வேளுக்குடி பாலம் எதிரில் சாலையோரத்தில் உள்ள மரத்தின் மீது மோதியது.

2 பேர் சாவு

இதில் பலத்த சேதம் அடைந்த காரின் இடிபாடுகளில் சிக்கிய பெரும்கடம்பனூரை சேர்ந்த சின்னையன் மனைவி சந்திரா(வயது70), ராமர் மகன் கணபதி (42) ஆகியோர் சம்பவ இடத்திலேயே பரிதாபமாக இறந்தனர். மேலும் இந்த விபத்தில் பலத்த காயம் அடைந்த காரை ஓட்டிச் சென்ற ராமச்சந்திரன் (37) மற்றும் விஜயலட்சுமி (30), சந்தோஷ் (16), குழந்தைகள் ஜெய்ஹரீஸ் (8), சாதனா(4) ஆகிய 5 பேர் படுகாயம் அடைந்து திருவாரூர் அரசு மருத்துவக் கல்லூரி ஆஸ்பத்திரியில் சிகிச்சை பெற்று வருகின்றனர். இது குறித்து கூத்தாநல்லூர் போலீசார் வழக்குப் பதிவு செய்து விசாரணை நடத்தி வருகின்றனர்.