காவலாளியை கத்தியை காட்டி மிரட்டி டாஸ்மாக் கடையில் கொள்ளை

பணகுடி:

பணகுடியில், காவலாளியை கத்தியை காட்டி மிரட்டி டாஸ்மாக் கடையில் துணிகர கொள்ளையில் ஈடுபட்ட 3 பேரை போலீசார் வலைவீசி தேடி வருகின்றனர்.

இந்த துணிகர சம்பவம் பற்றிய விவரம் வருமாறு:-

டாஸ்மாக் கடை

நெல்லை மாவட்டம் பணகுடியை அடுத்த தெற்கு வள்ளியூரில் இருந்து வடலிவிளை செல்லும் சாலையில் அரசு டாஸ்மாக் கடை உள்ளது.

நேற்று முன்தினம் இரவு வியாபாரம் முடிந்தவுடன் டாஸ்மாக் கடையை ஊழியர்கள் அடைத்து விட்டு சென்று விட்டனர். டாஸ்மாக் கடையின் காவலாளியான அதே பகுதியை சேர்ந்த தேவராஜ் (வயது 60) என்பவர் இரவு பணியில் இருந்தார்.

3 பேர் கும்பல்

இந்த நிலையில் நள்ளிரவு 3 பேர் டாஸ்மாக் கடைக்கு வந்தனர். திடீரென அந்த கும்பல் காவலாளி தேவராஜை கத்தியை காட்டி மிரட்டி, டாஸ்மாக் கடையின் பூட்டை உடைத்து ஷட்டரை இரும்பு கம்பி மூலம் வளைத்துள்ளனர்.

அதன்பின்னர் உள்ளே புகுந்த 3 பேர் அங்கு அடுக்கி வைக்கப்பட்டு இருந்த விலை உயர்ந்த மதுபாட்டில்களை சாக்கு பையில் கட்டி தூக்கிக்கொண்டு அங்கிருந்து தப்பி சென்று விட்டனர். அப்போது அங்கிருந்த கண்காணிப்பு கேமரா பதிவு ஹார்டிஸ்க்கையும் எடுத்து சென்றுள்ளனர். கொள்ளை போன மதுபாட்டில்களின் மதிப்பு சுமார் ரூ.1 லட்சம் இருக்கும் என தெரிகிறது.

இந்த துணிகர கொள்ளை குறித்து பணகுடி போலீசார் வழக்குப்பதிவு செய்து தப்பி ஓடிய 3 பேரை வலைவீசி தேடி வருகிறார்கள்.