உத்தமபாளையம் அருகே தொழிலாளி வீட்டில் ரூ.15 லட்சம் கொள்ளை

உத்தமபாளையம் அருகே க.புதுப்பட்டி எஸ்.டி.கே.நகரை சேர்ந்தவர் ஜெயகண்ணன் (வயது 48). கூலித்தொழிலாளி. இவரது மனைவி கார்த்திகா. இவர்களுக்கு ஒரு மகனும், ஒரு மகளும் உள்ளனர். இதில், அவர்களது மகன் திருமணமாகி வெளியூரில் தனியாக வசித்து வருகிறார். மகள் வெளியூரில் படித்து வருகிறார். ஜெயகண்ணன் அப்பகுதியில் திராட்சை தோட்டத்துக்கு வேலைக்கு சென்று வருகிறார். மனைவி கார்த்திகா கேரள மாநிலம் இடுக்கி மாவட்டத்தில் ஏலக்காய் தோட்ட வேலைக்கு ஜீப் மூலம் தினமும் சென்று வருகிறார். இந்தநிலையில் நேற்று முன்தினம் காலை வழக்கம்போல் ஜெயகண்ணனும், அவரது மனைவியும் வீட்டை பூட்டிவிட்டு வேலைக்கு சென்றுவிட்டனர். முன்னதாக வீட்டின் சாவியை ஜன்னல் அருகே வைத்துவிட்டு சென்றதாக கூறப்படுகிறது.

பின்னர் மாலையில் கணவன்-மனைவி 2 பேரும் வேலை முடிந்து வீட்டுக்கு திரும்பி வந்தனர். அப்போது வீட்டின் கதவு திறக்கப்பட்டு கிடந்தது. இதனால் அதிர்ச்சியடைந்த அவர்கள் வீட்டுக்குள் சென்று பார்த்தபோது, பீரோ திறக்கப்பட்டு, அதில் இருந்த பொருட்கள் சிதறிக்கிடந்தது. மேலும் பீரோவில் வைத்திருந்த ரூ.15 லட்சத்தை காணவில்லை. இதுகுறித்து ஜெயகண்ணன், உத்தமபாளையம் போலீஸ் நிலையத்தில் புகார் அளித்தார். அதன்பேரில் போலீசார் சம்பவம் நடந்து வீட்டுக்கு வந்து விசாரணை நடத்தினர். தேனியில் இருந்து மோப்பநாய் வரவழைக்கப்பட்டு சோதனை நடத்தப்பட்டது. அந்த மோப்பநாய் திருட்டு சம்பவம் நடந்த வீட்டில் இருந்து க.புதுப்பட்டியின் முக்கிய வீதிகள் வழியாக சென்று, அங்குள்ள பஸ் நிறுத்தம் வரை ஓடியது. ஆனால் யாரையும் கவ்வி பிடிக்கவில்லை. இந்த கொள்ளை சம்பவம் தொடர்பாக போலீசார் விசாரணை நடத்தி வருகின்றனர்.