தஞ்சையில் ரூ.133½ கோடியில் திட்டப்பணிகள்: முதல்-அமைச்சர் மு.க.ஸ்டாலின் திறந்து வைத்தார்

தஞ்சாவூர்,

தஞ்சை மாநகராட்சி பகுதியில் பொலிவுறு நகரம்(ஸ்மார்ட் சிட்டி) திட்டத்தின் கீழ் பல்வேறு பணிகள் மேற்கொள்ளப்பட்டு வருகிறது. இதில் பல்வேறு பணிகள் முடிவடைந்து பொதுமக்கள் பயன்பாட்டுக்கு திறந்து விடப்பட்டுள்ளன. இந்த நிலையில் மேலும் ரூ.133 கோடியே 56 லட்சம் மதிப்பிலான பணிகள் முடிவடைந்ததையடுத்து இதன் திறப்பு விழா நேற்று நடந்தது.

தஞ்சை புதிய பஸ் நிலையம் அருகே புதிதாக கட்டப்பட்டுள்ள மாநாட்டு மையத்தில் இந்த விழா நடந்தது. அமைச்சர்கள் கே.என்.நேரு, அன்பில் மகேஷ் பொய்யாமொழி, நகராட்சி நிர்வாகம் மற்றும் குடிநீர் வழங்கல் துறை முதன்மை செயலாளர் கார்த்திகேயன், நகராட்சி நிர்வாக இயக்குனர் சிவராசு ஆகியோர் முன்னிலை வகித்தனர்.

மு.க.ஸ்டாலின் திறந்து வைத்தார்

விழாவில் முதல்-அமைச்சர் மு.க.ஸ்டாலின் கலந்து கொண்டு முடிவடைந்த திட்டப்பணிகளை ரிமோட் மூலம் திறந்து வைத்தார். ரூ.61.79 கோடியில் கட்டப்பட்ட மாநாட்டு மைய கட்டிடம், ரூ.10.46 கோடி செலவில் கட்டப்பட்ட ஆம்னி பஸ் நிலைய வளாகம், ரூ.15.69 கோடியில் அமைக்கப்பட்ட சூரிய ஒளி மின் நிலையத்தை திறந்து வைத்தார். தஞ்சை மாநகராட்சியில் உள்ள 14 பள்ளிகளை ரூ.7.32 கோடியில் தொடுதிரை வசதி, கணினி, குளிர்சாதன வசதி என சீர்மிகு பள்ளிகளாக மாற்றப்பட்டதையும் திறந்து வைத்தார்.

மேலும் ரூ.11.50 கோடி மதிப்பில் அறிவியல், தொழில்நுட்பம், பொறியியல் மற்றும் கணித பூங்கா, ரூ.15.61 கோடி மதிப்பில் கட்டப்பட்ட காந்திஜி வணிக வளாகம், ரூ.2.25 கோடி மதிப்பில் மேம்படுத்தப்பட்ட கருணாசாமி கோவில் குளம், ரூ.1.44 கோடியில் மேம்படுத்தப்பட்ட அழகிகுளம், ரூ.3 கோடியில் கட்டப்பட்ட அண்ணாசாலை வணிக வளாகம், ஆகியவற்றையும் திறந்து வைத்தார்.

நோயாளி உடனிருப்போர் தங்குமிடம்

தேசிய நகர்ப்புற வாழ்வாதார மேம்பாட்டு திட்டத்தின் கீழ் ராசா மிராசுதார் அரசு ஆஸ்பத்திரியில் ரூ.1.50 கோடியில் நோயாளிகள் உடனிருப்போர் தங்குமிடம் கட்டிடம், மருத்துவக்கல்லூரி ஆஸ்பத்திரியில் புற்றுநோய் வார்டு அருகில் ரூ.1.50 கோடியிலும், தீப்புண் வார்டு அருகில் ரூ.1.50 கோடியிலும் கட்டப்பட்டுள்ள நோயாளியின் உடனிருப்போர் தங்குமிட கட்டிடத்தையும் திறந்து வைத்தார்.

மொத்தம் ரூ.133.56 கோடி மதிப்பில் முடிவடைந்த 12 திட்டப்பணிகளை முதல்-அமைச்சர் மு.க.ஸ்டாலின் தொடங்கி வைத்தார். அதனைத்தொடர்ந்து பொது நிதியில் ரூ.1 கோடியில் மாநகராட்சி ஆணையர் குடியிருப்பு கட்டுவதற்கான அடிக்கல்லையும் அவர் நாட்டினார்.

விழாவில் அமைச்சர்கள் எ.வ.வேலு, எம்.ஆர்.கே.பன்னீர்செல்வம், சிவசங்கர் உள்பட பலர் கலந்து கொண்டனர்.

திடீர் ஆய்வு

முன்னதாக திருச்சியில் இருந்து தஞ்சைக்கு வரும் வழியில் செங்கிப்பட்டி அருகே உள்ள மனையேறிப்பட்டி என்ற இடத்தில் முதல்-அமைச்சர் கார் வந்தபோது அந்த பகுதியில் உள்ள கிராம சேவை மையத்தில் கலைஞர் மகளிர் உரிமைத்தொகை திட்டத்துக்கான விண்ணப்பம் பதிவு செய்யும் பணி நடந்து வருவதை கேள்விப்பட்டு அங்கு திடீரென சென்றார்.

முகாமில் நடந்து வரும் பணிகளை அவர் பார்வையிட்டு ஆய்வு செய்தார்.