புதுச்சேரி ஜிப்மர் மருத்துவமனையில்வேலை வாங்கித்தருவதாக கூறி ரூ.31½ லட்சம் மோசடி செய்தவர் கைதுமேலும் 5 பேருக்கு போலீஸ் வலைவீச்சு

விழுப்புரம் மாவட்டம் திருவெண்ணெய்நல்லூர் அருகே இளந்துறை கிராமத்தை சேர்ந்தவர் நாராயணசாமி (வயது 62). இவர் தனக்கு தெரிந்த புதுச்சேரியை சேர்ந்த பிரபாகர் என்பவர் மூலம் புதுச்சேரி தர்மாபுரியை சேர்ந்த மணிகண்டன் என்பவருக்கு அறிமுகமானார்.

அப்போது மணிகண்டன், அவரது மனைவி மகேஸ்வரி ஆகியோர் நாராயணசாமியிடம் சென்று, தாங்கள் இருவரும் புதுச்சேரி ஜிப்மர் மருத்துவமனையில் வேலை செய்து வருவதாகவும் தங்களுக்கு உயர் அதிகாரிகள் நன்கு பழக்கம், எனவே உங்களுக்கு தெரிந்தவர்கள் யாராவது இருந்தால் அவர்களுக்கு தாங்கள் வேலை வாங்கி தருவதாக கூறினர்.

இதை நம்பிய நாராயணசாமி, தனது மருமகள் சுகன்யா உள்பட 6 பேருக்கு வேலை வாங்கிதரக்கோரி மொத்தம் ரூ.40 லட்சத்தை மணிகண்டன், பிரபாகர், மணிகண்டன் மனைவி மகேஸ்வரி, மணிகண்டனின் தந்தை முனியப்பன், தாய் சாந்தி, தங்கை நித்யா ஆகியோரிடம் கொடுத்தனர். ஆனால், அவர்கள் போலி பணி நியமன ஆணையை வழங்கி ஏமாற்றி விட்டனர்.

இதையடுத்து பணத்தை திருப்பித் தரும்படி கேட்டதற்கு ரூ.8 லட்சத்து 50 ஆயிரத்தை மட்டும் திருப்பிக்கொடுத்துள்ளனர். மீதமுள்ள ரூ.31 லட்சத்து 50 ஆயிரத்தை தராமல் அவர்கள் ஏமாற்றி மோசடி செய்துவிட்டனர். இதுகுறித்து நாராயணசாமி, விழுப்புரம் மாவட்ட குற்றப்பிரிவு போலீசில் அளித்த புகாரின்பேரில் 6 பேர் மீது வழக்குப்பதிவு செய்து, முனியப்பனை (54) போலீசார் கைது செய்தனர். மற்ற 5 பேரை வலைவீசி தேடி வருகின்றனர்.