பனியன் நிறுவன ஊழியரின் வங்கி கணக்கில் ரூ.79 ஆயிரத்து 800 அபேஸ்

திருப்பூர்:

திருப்பூர் காமாட்சி அம்மன் கோவில் வீதியைச் சேர்ந்தவர் லோகேஷ் (வயது 32). இவர் பனியன் நிறுவன ஊழியராக உள்ளார். கடந்த 13-ந் தேதி இவருடைய செல்போன் எண்ணுக்கு பேசிய நபர், வங்கி அதிகாரி போல் பேசி ஏ.டி.எம். கார்டில் உள்ள எண்களை கேட்டுள்ளார். அதை நம்பிய லோகேஷ் அவரிடம் தெரிவித்துள்ளார். பின்னர் ஓ.டி.பி. எண்ணையும் தெரிவிக்க, லோகேசின் வங்கி கணக்கில் இருந்து ரூ.79 ஆயிரத்து 800 எடுக்கப்பட்டது.

இதனால் அதிர்ச்சி அடைந்த லோகேஷ் திருப்பூர் மாநகர சைபர் கிரைம் போலீசில் புகார் அளித்தார். மாநகர போலீஸ் கமிஷனர் ஏ.ஜி. பாபு உத்தரவின்பேரில் இன்ஸ்பெக்டர் சொர்ணவல்லி, சப்-இன்ஸ்பெக்டர் சையத் ரபீக் சிக்கந்தர் மற்றும் போலீசார் இதுகுறித்து வழக்குப்பதிவு செய்து விசாரணை நடத்தினார்கள்.

விசாரணையில் திண்டுக்கல் மாவட்டம் சின்னாளபட்டியை சேர்ந்த ரவிசங்கர் (32), தர்மபுரியை சேர்ந்த சுமன் (25) ஆகிய இவர்கள் இருவரும் பெங்களூருவில் இருந்தனர். மேலும் சேலம் எடப்பாடியை சேர்ந்த குணசேகரன் (34), சேலத்தை சேர்ந்த விஷால் (27), தர்மபுரி பாப்பிரெட்டிப்பட்டியை சேர்ந்த உதயரமேஷ் (25) ஆகியோர் சேர்ந்து வங்கி அதிகாரிகள் போல் நடித்து ஏமாற்றி பணத்தை அபேஸ் செய்தது தெரியவந்தது. எனவே 5 பேரையும் சைபர் கிரைம் போலீசார் கைது செய்து நீதிமன்ற காவலுக்கு நேற்று அனுப்பி வைத்தனர்.