சாத்தான்குளம் அரசு கல்லூரியில் திறந்தநிலை பல்கலைக்கழக மாணவர் சேர்க்கை தேதி நீட்டிப்பு

தட்டார்மடம்:

சாத்தான்குளம் அரசு மகளிர் கலை மற்றும் அறிவியல் கல்லூரி முதல்வர் சின்னத்தாய் விடுத்துள்ள செய்திக்குறிப்பில் கூறியிருப்பதாவது:-

சாத்தான்குளம் அரசு மகளிர் கலை மற்றும் அறிவியல் கல்லூரியில் திறந்த நிலைப் பல்கலைக்கழக மாணவர் சேர்க்கை வருகிற 15-ந் தேதி வரை நீட்டிக்கப்பட்டுள்ளது. கல்லூரியில் நேரடி இடம் கிடைக்காமல், கல்வி பயில முடியாத மாணவர்கள், அரசு மற்றும் தனியார் நிறுவனங்களில் பணிபுரிபவர்கள் இதில் சேர்ந்து படித்து பட்டங்களை பெற இயலும். திறந்தநிலைப் பல்கலைகழகத்தில் உள்ள பட்டப்படிப்புகள், பட்ட மேற்படிப்புகள் அனைத்தும் யூஜிசி அங்கீகாரம் பெற்றது. மேலும் டிப்ளமோ சான்றிதழ் வகுப்புகளும் பயிற்றுவிக்கப்படுகின்றன.

இப்படிப்புகள் குறித்த முழு தகவல்களை கல்லூரி பேராசிரியையும், திறந்த நிலைப் பல்கலைக்கழக பொறுப்பாசிரியருமான பிரேசிலை 9445641770 என்ற எண்ணில் தொடர்பு கொண்டு தெரிந்து கொள்ளலாம். சேர்க்கையானது இணையதளம் மூலம் நடைபெற உள்ளதால் சேர்க்கைக்கு வர விரும்புவோர் தங்களது ஆதார், பாஸ்போர்ட் அளவு புகைப்படம், கையெழுத்து, 10-ம் வகுப்பு, பிளஸ்-2 அல்லது இளங்கலை சான்றிதழ்களை ஸ்கேன் செய்து tnousat@gmail.com என்ற மின்னஞ்சல் முகவரிக்கு அனுப்ப வேண்டும்.

இவ்வாறு அவர் தெரிவித்துள்ளார்.