ரூ.61¾ லட்சம் மோசடி செய்த கேபிள் டி.வி. ஆபரேட்டர் கைது

அரசு வேலை வாங்கி தருவதாக கூறி ரூ.61¾ லட்சம் மோசடி செய்த கேபிள் டி.வி. ஆபரேட்டரை மாவட்ட குற்றப்பிரிவு போலீசார் கைது செய்தனர்.

கேபிள் டி.வி. ஆபரேட்டர்

திருவண்ணாமலை மாவட்டம் கலசபாக்கம் தாலுகா விண்ணுவாம்பட்டு பகுதியை சேர்ந்தவர் சிலம்பரசன் (வயது 29), கேபிள் டி.வி. ஆபரேட்டர்.

இவர் கடந்த 2021-ம் ஆண்டு ஏப்ரல் மாதம் 30-ந் தேதி கேபிள் டி.வி. இணைப்புக்கான பணத்தை வசூல் செய்வதற்காக திருவண்ணாமலை தாலுகா கொளக்கரவாடி கொளத்தூர் கிராமத்தை சேர்ந்த அர்ஜூனன் என்பவர் வீட்டிற்கு சென்றார்.

அப்போது அவரிடம், சிலம்பரசன் எனக்கு உயர் அதிகாரிகளை தெரியும், அவர்கள் மூலம் பல நபர்களுக்கு அரசு வேலை வாங்கி கொடுத்து உள்ளேன்.

உங்களுக்கு தெரிந்தவர்கள் யாராவது இருந்தால் சொல்லுங்கள். பணம் கொடுத்தால் ரெயில்வே துறை, கலெக்டர் அலுவலகம், வங்கி, ஆர்.டி.ஓ.அலுவலகங்களில் வேலை வாங்கி தருவதாக கூறியுள்ளார்.

இதை நம்பிய அர்ஜூனன் அவரது மகன் மற்றும் மகளின் பிள்ளைகளுக்கு என மொத்தம் 6 பேருக்கு அரசு வேலைக்காக மொத்தம் ரூ.16 லட்சத்து 80 ஆயிரத்தை சிலம்பரசனிடம் கொடுத்து உள்ளார்.

ரூ.61 லட்சத்து 80 ஆயிரம்

இதேபோல் கொளக்கரவாடியை சேர்ந்த 21 பேர் மொத்தம் ரூ.45 லட்சத்தை சிலம்பரசனிடம் கொடுத்து உள்ளனர். ஆக மொத்தம் 27 பேருக்கு அரசு வேலை வாங்கி தருவதாக கூறி அவர் மொத்தம் ரூ.61 லட்சத்து 80 ஆயிரத்தை பெற்று கொண்டுள்ளார்.

ஆனால் யாருக்கும் வேலை வாங்கி தரவில்லை.

மேலும் பல காரணங்கள் கூறி காலம் தாழ்த்தி வந்ததால் சிலம்பரசனிடம் பணம் கொடுத்தவர்கள் அவரின் வீட்டிற்கு சென்று அரசு வேலை வேண்டாம் எங்களுடைய பணத்தை திருப்பி கொடுத்து விடுங்கள் என்று கேட்டு உள்ளனர்.

அப்போது சிலம்பரசன் பணத்தை தர முடியாது பணத்தை கேட்டு வந்தால் கொலை செய்து விடுவேன் என்று மிரட்டியதாகவும், மேலும் அவரது மனைவி சத்யா (23) மற்றும் தாய் குப்பு (56) ஆகியோர் தகாத வார்த்தைகளால் பேசி திட்டி யாரும் பணத்தை கேட்டு வரக் கூடாது என்று மிரட்டியதாகவும் கூறப்படுகிறது.

கைது

இதுகுறித்து அர்ஜூனன் மற்றும் பாதிக்கப்பட்டவர்கள் திருவண்ணாமலை மாவட்ட போலீஸ் சூப்பிரண்டு அலுவலகத்தில் புகார் மனு அளித்தனர். இதையடுத்து போலீஸ் சூப்பிரண்டு கார்த்திகேயன் உத்தரவின் பேரில் திருவண்ணாமலை மாவட்ட குற்றப்பிரிவு போலீசார் வழக்குப்பதிவு செய்து சிலம்பரசனை கைது செய்தனர்.

மேலும் தலைமறைவாக உள்ள சிலம்பரசனின் மனைவி சத்யா மற்றும் தாய் குப்பு ஆகியோரை போலீசார் தேடி வருகின்றனர்.