விமான நிலையத்தில் பாதுகாப்பு விழிப்புணர்வு வார விழா

மதுரை விமான நிலையத்தில் மத்திய விமான போக்குவரத்து அமைச்சகம் மற்றும் விமான நிலைய பாதுகாப்பு பணியகம் சார்பில் பாதுகாப்பு விழிப்புணர்வு மற்றும் கலாசார வார விழா நேற்று தொடங்கியது.

மதுரை விமான நிலைய இயக்குனர் முத்துக்குமார், விமான நிலைய பாதுகாப்பு முதன்மை அதிகாரி கணேசன், மத்திய தொழில் பாதுகாப்பு படை துணை கமாண்டன்ட் விஸ்வநாதன் மற்றும் விமான நிலைய ஊழியர்கள், இன்டிகோ, ஸ்பைஸ்ஜெட், ஏர் இந்தியா, ஏர் இந்தியா எக்ஸ்பிரஸ் விமான நிறுவன அலுவலர்கள் கலந்து கொண்டனர். இதில் விமான நிலைய பாதுகாப்பு மற்றும் பயணிகளை வழிநடத்தும் விதிகள், பயணிகள் விமான பயணத்தின் போது செயல்படும் விதம், தடைசெய்யப்பட்ட ஆயுதம் மற்றும் பொருள்கள் கொண்டு செல்ல தடை ஆகியவை குறித்து எடுத்துரைக்கப்பட்டது.

உறுதிமொழியுடன் தொடங்கிய இந்த நிகழ்ச்சியையொட்டி, வருகிற 6-ந் தேதி வரை மத்திய தொழில் பாதுகாப்பு படை வீரர்களின் பல்வேறு சாதனைகள், மோப்பநாய்களின் தனித்திறன் மற்றும் விமான நிறுவன ஊழியர்களின் கலாசார கலை நிகழ்ச்சி, ஓவியம், விளையாட்டு போட்டிகள் நடைபெறுகிறது. முடிவில் ஏர் இந்தியா விமான நிறுவன பாதுகாப்பு அதிகாரி சவுமியா நன்றி கூறினார்.