தூத்துக்குடியில் தொடர் மோட்டார் சைக்கிள் திருட்டு:சிறுவன் உள்பட 3 பேர் சிக்கினர்

தூத்துக்குடியில் மோட்டார் சைக்கிள்களை திருடிய வழக்கில் சிறுவன் உள்பட 3 பேர் கைது செய்யப்பட்டனர்.

மோட்டார் சைக்கிள் திருட்டு

தூத்துக்குடி கதிர்வேல்நகரை சேர்ந்தவர் பிச்சேந்திரமூர்த்தி (வயது 32). இவருடைய மோட்டார் சைக்கிளை மர்ம ஆசாமிகள் திருடி சென்று விட்டார்களாம். இதே போன்று தபால்தந்தி காலனி உள்ளிட்ட பகுதிகளிலும் தொடர்ச்சியாக மொத்தம் 3 மோட்டார் சைக்கிள்கள் திருட்டு போனது. இது குறித்த புகார்களின் பேரில் சிப்காட் போலீசார் வழக்கு பதிவு செய்து தீவிர விசாரணை நடத்தினர். மோட்டார் சைக்கிள்கள் திருடப்பட்ட இடத்தில் உள்ள கண்காணிப்பு கேமிராக்களில் பதிவான காட்சிகளை கைப்பற்றி ஆய்வு செய்தனர்.

கைது

அப்போது, தூத்துக்குடி மடத்தூர் ரோடு முத்துநகரை சேர்ந்த பாலசுப்பிரமணியன் (24), திரு.வி.க.நகரை சேர்ந்த சுடலைமுத்து என்ற சுரேஷ் (19) மற்றும் 16 வயது சிறுவன் உள்ளிட்ட 4 பேர் சேர்ந்து மோட்டார் சைக்கிள்களை திருடி இருப்பது தெரியவந்தது. உடனடியாக போலீசார் பாலசுப்பிரமணியன், சுடலைமுத்து என்ற சுரேஷ் மற்றும் சிறுவனையும் நேற்று கைது செய்தனர். மேலும் ஒருவரை தேடி வருகின்றனர். கைது செய்யப்பட்டவர்களிடம் இருந்து 3 மோட்டார் சைக்கிள்களையும் போலீசார் மீட்டனர்.