சேது சமுத்திர திட்டத்தை நிறைவேற்ற வேண்டும்

பொதுக்கூட்டம்

திராவிடர் கழகம் சார்பில் சமூக நீதி பாதுகாப்பு, திராவிட மாடல் விளக்க பொதுக்கூட்டம் காட்பாடி காந்திநகரில் நேற்று நடந்தது. பொதுக்கூட்டத்திற்கு வேலூர் மாவட்ட திராவிடர் கழகத்தலைவர் அன்பரசன் தலைமை தாங்கினார். இதில் திராவிடர் கழக தலைவர் கி.வீரமணி கலந்து கொண்டு சிறப்புரை ஆற்றினார்.

அப்போது அவர் பேசியதாவது:-

அரசு பள்ளியில் படித்த மாணவிகள் கல்லூரிக்கு சென்று படித்தால் மாதம் ரூ.1,000 வழங்கும் திட்டத்தை தமிழக முதல்-அமைச்சர் மு.க.ஸ்டாலின் கொண்டு வந்தார். இதனால் ஒரு மாணவிக்கு ஆண்டுக்கு ரூ.12 ஆயிரம் கிடைக்கும். கல்வித்துறையில் தற்போது மறுமலர்ச்சி ஏற்பட்டுள்ளது.

காலை சிற்றுண்டி திட்டம்

தற்போது நடக்கும் ஆட்சியில் மாணவர்களுக்கு காலை சிற்றுண்டி வழங்கும் திட்டத்தை முதல்-அமைச்சர் மு.க.ஸ்டாலின் செயல்படுத்தி உள்ளார். அரசின் திட்டங்களுக்கு கவர்னர் முட்டுக்கட்டை போட்டு 15 மசோதாக்களை கிடப்பில் போட்டுள்ளார். எத்தனை அண்ணாமலைகள் வந்தாலும் தமிழ்நாட்டில் பா.ஜ.க. ஆட்சியை பிடிக்க முடியாது. பாராளுமன்ற தேர்தலிலும் பா.ஜ.கவுடன் கூட்டணி என அ.தி.மு.க.வினர் கூறுகின்றனர்.

முதல்-அமைச்சரை, எதிர்க்கட்சித் தலைவர் எடப்பாடி பழனிசாமி ஒருமையில் பேசுகிறார். ஈரோடு கிழக்கு தொகுதியில் டெபாசிட் இழந்து விடுவோம் என்ற கோபத்தில் அவர் பேசியதாக தெரிகிறது. இதன் மூலம் தி.மு.க. வெற்றிக்கு எடப்பாடி பழனிசாமியின் பேச்சு வலு சேர்க்கும்.

சேது சமுத்திர திட்டம்

தி.மு.க கொடுத்த வாக்குறுதிகளில் 86 சதவீத வாக்குறுதிகளை நிறைவேற்றி உள்ளது. சேது சமுத்திர திட்டத்தை மத்திய அரசு நிறைவேற்ற வேண்டும் என சட்டமன்றத்தில் முதல்-அமைச்சர் மு.க.ஸ்டாலின் தீர்மானத்தை நிறைவேற்றினார். அந்த திட்டத்தை நிறைவேற்ற வேண்டும். மாநில உரிமையை மீட்டெடுக்க வேண்டும். திராவிட மாடல் ஆட்சியை பாதுகாப்போம்.

இவர் அவர் பேசினார்.