தேசிய மக்கள் நீதிமன்றத்தில் 3,272 வழக்குகளுக்கு தீர்வு

தேசிய மக்கள் நீதிமன்றம்

தேனி மாவட்டத்தில் உள்ள கோர்ட்டுகளில் தேசிய மக்கள் நீதிமன்றம் நடந்தது. மாவட்ட சட்டப் பணிகள் ஆணைக்குழு சார்பில் மாவட்ட ஒருங்கிணைந்த கோர்ட்டு வளாகத்தில் நடந்த தேசிய மக்கள் நீதிமன்றத்துக்கு மாவட்ட செசன்சு நீதிபதி சஞ்சய் பாபா தலைமை தாங்கினார். மாவட்ட சட்டப்பணிகள் ஆணைக்குழு செயலாளர் ராஜமோகன் முன்னிலை வகித்தார். குடும்பநல கோர்ட்டு நீதிபதி ஈஸ்வரன், தலைமை ஜுடிசியல் மாஜிஸ்திரேட்டு கோபிநாதன், சார்பு நீதிபதி சுந்தரி, மாவட்ட உரிமையியல் நீதிபதி கண்ணன், ஜுடிசியல் மாஜிஸ்திரேட்டு லலிதாராணி ஆகியோர் கலந்துகொண்டனர்.

பெரியகுளம் கோர்ட்டில் கூடுதல் மாவட்ட நீதிபதி சிங்கராஜ், சார்பு நீதிபதி மாரியப்பன், ஜுடிசியல் மாஜிஸ்திரேட்டு சாமிளா ஆகியோர் முன்னிலையிலும், உத்தமபாளையம் கோர்ட்டில் சார்பு நீதிபதி சுரேஷ்குமார், மாவட்ட உரிமையியல் நீதிபதி சரவணசெந்தில் குமார், மாஜிஸ்திரேட்டு ராமநாதன் ஆகியோர் முன்னிலையிலும், தேசிய மக்கள் நீதிமன்றம் நடந்தது.

3,272 வழக்குகள் தீர்வு

ஆண்டிப்பட்டி கோர்ட்டில் மாவட்ட உரிமையியல் நீதிபதி ராஜேஷ், ஜுடிசியல் மாஜிஸ்திரேட்டு பிச்சைராஜன் ஆகியோர் முன்னிலையிலும், போடி கோர்ட்டில் மாவட்ட உரிமையியல் நீதிபதி உம்முல் பரிதா, ஜுடிசியல் மாஜிஸ்திரேட்டு வேலுமயில் ஆகியோர் முன்னிலையிலும் தேசிய மக்கள் நீதிமன்றம் நடந்தது.

இந்த தேசிய மக்கள் நீதிமன்றத்தில் நிலுவையில் உள்ள வழக்குகள் மற்றும் வங்கிகளில் வராக்கடன்கள் தொடர்பான வழக்குகள் விசாரணைக்கு எடுத்துக் கொள்ளப்பட்டன. மாவட்டத்தில் உள்ள கோர்ட்டுகளில் நேற்று நடந்த தேசிய மக்கள் நீதிமன்றத்தின் மூலம், மொத்தம் 3,272 வழக்குகள் தீர்வு காணப்பட்டன. இதன் மூலம் நிலுவை வழக்குகளில் ரூ.17 கோடியே 47 லட்சத்து 28 ஆயிரத்து 69 மதிப்பில் தீர்வு பெற்றுக் கொடுக்கப்பட்டன.