17 பதவிகளுக்கு இதுவரை 11 பேர் மனு தாக்கல்

திருச்சி, ஜூன்.25-

திருச்சிமாவட்டத்தில் 17 பதவிகளுக்கு வருகிற 9-ந் தேதி ஊரக உள்ளாட்சி இடைத்தேர்தல் நடக்கிறது. இந்த பதவிகளுக்கு இதுவரை 11 பேர் மனுத்தாக்கல் செய்துள்ளனர்.

ஊரக உள்ளாட்சி இடைத்தேர்தல்

திருச்சி மாவட்ட ஊரக உள்ளாட்சி அமைப்புகளில் கடந்த ஏப்ரல் மாதம் 30-ந் தேதி வரை காலியாக உள்ள துறையூர் ஒன்றிய 12-வது வார்டு உறுப்பினர், மருங்காபுரி ஒன்றியம் பளுவஞ்சி கிராம ஊராட்சி தலைவர், லால்குடி ஒன்றியம் சாத்தமங்கலம் கிராம ஊராட்சி தலைவர் ஆகிய 2 ஊராட்சி தலைவர் பதவி இடங்கள், அந்தநல்லூர் ஒன்றியம் அல்லூர் கிராம ஊராட்சி 5-வது வார்டு உறுப்பினர், லால்குடி ஒன்றியம் அரியூர் கிராம ஊராட்சி 1-வது வார்டு, மணப்பாறை ஒன்றியம் எப்.கீழையூர் 5-வது வார்டு, புத்தாநத்தம் கிராம ஊராட்சி 5-வது வார்டு, மண்ணச்சநல்லூர் ஒன்றியம் தீராம்பாளையம் கிராம ஊராட்சி 2, 3, 5, 6, 8 ஆகிய வார்டுகள், புள்ளம்பாடி ஒன்றியம் நெய்குளம் கிராம ஊராட்சி 7-வது வார்டு, தாத்தையங்கார்பேட்டை ஒன்றியம் சிட்டிலரை கிராம ஊராட்சி 9-வது வார்டு, திருவெறும்பூர் ஒன்றியம் பனையக்குறிச்சி கிராம ஊராட்சி 3-வது வார்டு, தொட்டியம் ஒன்றியம் பிடாரமங்கலம் கிராம ஊராட்சி 3-வது வார்டு, துறையூர் ஒன்றியம் கொட்டையூர் கிராம ஊராட்சி 4-வது வார்டு ஆகிய பதவியிடங்களுக்கு வருகிற 9-ந் தேதி இடைத்தேர்தல் நடக்கிறது.

இதுவரை 11 பேர் மனுத்தாக்கல்

வேட்புமனு தாக்கல் கடந்த 20-ந் தேதி தொடங்கியது. வருகிற 27-ந் தேதியுடன் மனுத்தாக்கல் நிறைவடைகிறது. 28-ந் தேதி வேட்புமனுக்கள் பரிசீலனை நடக்கிறது. 30-ந் தேதி வேட்பு மனுக்கள் வாபஸ் பெறப்படும். ஜூலை 12-ந் தேதி வாக்கு எண்ணிக்கை நடக்கிறது. ஜூலை 14-ந் தேதியுடன் தேர்தல் நடத்தை விதிகள் நிறைவடைகிறது.

மொத்தமுள்ள 17 பதவியிடங்களில் துறையூர் ஒன்றிய கவுன்சிலருக்கு ஒருவர், மருங்காபுரி ஒன்றியம் பளுவஞ்சி ஊராட்சி தலைவருக்கு ஒருவர், லால்குடி சாத்தமங்கலம் ஊராட்சி தலைவருக்கு 2 பேர், அந்தநல்லூர் ஒன்றியம் அல்லூர் வார்டு உறுப்பினருக்கு ஒருவர், திருவெறும்பூர் ஒன்றியம் பனையக்குறிச்சி வார்டு உறுப்பினருக்கு ஒருவர், மணப்பாறை புத்தாநத்தம் வார்டு உறுப்பினருக்கு 2 பேர், லால்குடி ஒன்றியம் அரியூர் வார்டு உறுப்பினருக்கு ஒருவர், தொட்டியம் பிடாரமங்கலம் வார்டு உறுப்பினருக்கு ஒருவர், துறையூர் ஒன்றியம் கொட்டையூர் வார்டு உறுப்பினருக்கு ஒருவர் என இதுவரை 11 பேர் மனுத்தாக்கல் செய்துள்ளனர். மனுத்தாக்கல் நாளை மறுநாள் (திங்கட்கிழமை) நிறைவடைகிறது.