சோரைகுண்டு ஸ்டார்ஸ் அணி வெற்றி

கோத்தகிரி

நீலகிரி மாவட்ட கிரிக்கெட் சங்கம் சார்பில், மாவட்ட அளவிலான ஏ, பி மற்றும் சி டிவிஷன் கிரிக்கெட் போட்டிகள் கோத்தகிரி காந்தி மைதானத்தில் நடைபெற்று வருகிறது. இந்தநிலையில் நேற்று நடைபெற்ற சி டிவிஷன் பிரிவு லீக் போட்டியில் சோரைகுண்டு ஸ்போர்ட்ஸ் ஸ்டார்ஸ் அணியும், ஹில்ஸ் குயின் அணியும் மோதியது. இந்த போட்டியில் டாஸ் வென்று முதலில் பேட்டிங் செய்த சோரைகுண்டு ஸ்போர்ட்ஸ் ஸ்டார்ஸ் அணி நிர்ணயிக்கப்பட்ட 35 ஓவர்களில், 27.2 ஓவர்கள் மட்டுமே விளையாடி அனைத்து விக்கெட்டுகளையும் இழந்து 167 ரன்கள் எடுத்தது. இந்த அணி வீரர் பாலசுப்பிரமணி அதிகபட்சமாக 46 ரன்கள் எடுத்து அவுட்டாகாமல் இருந்தார். ஹில்ஸ் குயின் அணியின் பந்து வீச்சாளர் அலெக்சாண்டர் 4 விக்கெட்டுகளை வீழ்த்தினார். இதைத்தொடர்ந்து 210 பந்துகளில் 168 ரன்கள் எடுத்தால் வெற்றி என்ற இலக்குடன் விளையாடிய ஹில்ஸ் குயின் அணி 21.5 ஓவர்களில் 139 ரன்கள் மட்டுமே எடுத்து ஆல் அவுட் ஆனது. இந்த அணி வீரர்கள் லாவா, பால் பாண்டியன் ஆகியோர் தலா 33 ரன்கள் எடுத்தனர். சோரைகுண்டு அணியின் பந்து வீச்சாளர் கார்த்திக் 5 விக்கெட்டுகளை வீழ்த்தினார். இதன் மூலம் 28 ரன்கள் வித்தியாசத்தில் சோரைகுண்டு ஸ்போர்ட்ஸ் ஸ்டார்ஸ் அணி வெற்றி பெற்றது.