கரூர் மாவட்ட பெருமாள் கோவில்களில் சிறப்பு வழிபாடு

கரூர் தாந்தோணிமலையில் பிரசித்தி பெற்ற கல்யாண வெங்கடரமண சுவாமி கோவில் உள்ளது. இக்கோவிலில் புரட்டாசி 3-வது சனிக்கிழமையையொட்டி நேற்று சுவாமிக்கு பால், பழம், விபூதி, சந்தனம், மஞ்சள் உள்பட பல்வேறு வாசனை திரவியங்களால் அபிஷேகம் நடந்தது. தொடர்ந்து சிறப்பு தீபாராதனை நடந்தது. இதையடுத்து திரளான பக்தர்கள் நீண்ட வரிசையில் காத்திருந்து சுவாமியை வழிபட்டு சென்றனர். நொய்யல் அருகே கோம்புப்பாளையத்தில் உள்ள ஸ்ரீதேவி பூதேவி சமேத சீனிவாச பெருமாள் கோவிலில் புரட்டாசி மாத 3-வது சனிக்கிழமையை முன்னிட்டு சுவாமிக்கு பால், தயிர், பன்னீர், இளநீர்,சந்தனம் உள்ளிட்ட 18 வகையான வாசனை திரவியங்களால் அபிஷேகம் நடைபெற்றது.

இதேபோல வேலாயுதம்பாளையம் அருகே உள்ள சேங்கல் மலை வரதராஜ பெருமாள் கோவிலில் சுவாமிக்கு பால், தயிர், இளநீர், பன்னீர், விபூதி உள்ளிட்ட 18 வகையான வாசனை திரவியங்களால் அபிஷேகம் நடந்தது.

கரூர் வெண்ணைமலையில் அமைந்துள்ள ஆத்மநேச ஆஞ்சநேயர் கோவிலில் சுவாமிக்கு உலக மக்கள் அனைவரும் ஒன்றுபட்டு சகோதரத்துவத்துடன் நோய் நொடியின்றி வாழ வேண்டி சிறப்பு பூஜைகள் நடந்தது. இதில் திரளான பக்தர்கள் கலந்து கொண்டனர்.