எஸ்.எஸ்.எல்.சி. பொதுத்தேர்வு:மாவட்டத்தில் 25,591 பேர் எழுதுகிறார்கள்

ஈரோடு மாவட்டத்தில் எஸ்.எஸ்.எல்.சி. பொதுத்தேர்வை 25 ஆயிரத்து 591 மாணவ- மாணவிகள் எழுதுகின்றனர்.

எஸ்.எஸ்.எல்.சி. பொதுத்தேர்வு

தமிழ்நாட்டில் பிளஸ்-2 பொதுத்தேர்வு வருகிற 3-ந்தேதியும், பிளஸ்-1 பொதுத்தேர்வு 5-ந் தேதியும் நிறைவுபெற உள்ளது. இதைத்தொடர்ந்து எஸ்.எஸ்.எல்.சி. மாணவ -மாணவிகளுக்கு அரசு பொதுத்தேர்வு வருகிற 6-ந்தேதி தொடங்கி 20-ந்தேதி வரை நடைபெற உள்ளது.

ஈரோடு மாவட்டத்தில் எஸ்.எஸ்.எல்.சி. பொதுத்தேர்வை 358 பள்ளிக்கூடங்களில் படிக்கும் 25 ஆயிரத்து 591 மாணவ-மாணவிகள் எழுத உள்ளனர். இவர்களுக்கு தேர்வு எழுத வசதியாக 113 தேர்வு மையங்களும், தனித்தேர்வர்கள் தேர்வு எழுதுவதற்கு கூடுதலாக 6 மையங்களும் என மொத்தம் மாவட்டத்தில் 119 மையங்கள் அமைக்கப்பட்டு உள்ளன.

விடைத்தாள் திருத்த 3 மையங்கள்

இதற்கிடையில் எஸ்.எஸ்.எல்.சி. வினாத்தாள் ஈரோடு உள்பட மாவட்டத்தில் 7 கட்டு காப்பு மையத்தில் வைக்கப்பட்டு, துப்பாக்கி ஏந்திய போலீஸ் பாதுகாப்பு போடப்பட்டுள்ளது. மேலும் வினாத்தாள் மையத்தில் கண்காணிப்பு கேமரா பொருத்தப்பட்டு, 24 மணி நேரமும் கண்காணிக்கப்பட்டு வருகிறது.

ஈரோடு மாவட்டத்தில் எஸ்.எஸ்.எல்.சி. பொதுத்தேர்வு விடைத்தாள் திருத்துவதற்கு ஈரோடு செங்கோடம்பள்ளத்தில் உள்ள யு.ஆர்.சி. பள்ளிக்கூடம், கோபியில் உள்ள குருகுலம் பள்ளிக்கூடம், சத்தியமங்கலத்தில் உள்ள ராகவேந்திரா பள்ளிக்கூடம் என 3 மையங்கள் அமைக்கப்பட்டுள்ளன. தேர்வு முடிந்ததும் பள்ளிக்கல்வித்துறை சார்பில் தேதி அறிவித்த பின்னர் விடைத்தாள் திருத்தும் பணி தொடங்கும். தேர்வு தொடங்க இன்னும் 7 நாட்களே உள்ளதால் தேர்வுக்கான ஏற்பாடுகளை தீவிரமாக மேற்கொண்டு வருவதாக பள்ளிக்கல்வித்துறை அதிகாரிகள் தெரிவித்தனர்.