திருக்கோவிலூரில் நடந்த மாநில அளவிலான ஆணழகன் போட்டியில் வெற்றி பெற்றவர்களுக்கு பரிசு டாக்டர் பொன்.கவுதமசிகாமணி எம்.பி. வழங்கினாா்

திருக்கோவிலூர்,

திருக்கோவிலூர் நகர தி.மு.க. இளைஞரணி சார்பில் மாநில அளவிலான மாபெரும் ஆணழகன் போட்டி திருக்கோவிலூரில் நடைபெற்றது. இதற்கு விழுப்புரம் மத்திய மாவட்ட துணைச் செயலாளரும், திருக்கோவிலூர் நகர மன்ற தலைவருமான டி.என்.முருகன் தலைமை தாங்கினார். போட்டியில் கலந்து கொண்ட அனைவரையும் நகர இளைஞரணி அமைப்பாளர் நவநீதகிருஷ்ணன் வரவேற்றார். கள்ளக்குறிச்சி மாவட்ட ஊராட்சிக்குழு துணைத்தலைவரும், திருக்கோவிலூர் கிழக்கு ஒன்றிய செயலாளருமான வக்கீல் தங்கம், நகர செயலாளர் கோபிகிருஷ்ணன், நகர அவைத்தலைவர் குணா, தலைமை செயற்குழு உறுப்பினர் செல்வராஜ் ஆகியோர் முன்னிலை வகித்தனர்.

ஆணழகன் போட்டியில் தமிழகத்தின் பல்வேறு பகுதிகளில் இருந்து 150-க்கும் மேற்பட்ட இளைஞர்கள் பங்கேற்றனர். போட்டியின் முடிவில் கன்னியாகுமரி மாவட்டத்தை சேர்ந்த அன்கிரிஷ் பிரசாத் ஆணழகனாக தேர்வு செய்யப்பட்டார். சென்னையை சேர்ந்த ராஜ்குமார் உடல்தகுதி தேர்வில் முதலிடம் பிடித்தார். இதேபோல் பல்வேறு பிரிவுகளின் கீழ் தேர்வு செய்யப்பட்டவர்களுக்கு பரிசுகள் வழங்கும் நிகழ்ச்சி நடைபெற்றது. சிறப்பு அழைப்பாளராக கள்ளக்குறிச்சி நாடாளுமன்ற உறுப்பினர் டாக்டர் பொன்.கவுதமசிகாமணி கலந்து கொண்டு போட்டிகளில் வெற்றி பெற்றவர்களுக்கு பரிசு வழங்கி பாராட்டி பேசினார். நிகழ்ச்சியில் ஒன்றிய தி.மு.க செயலாளர்கள் ரவிச்சந்திரன், அ.சா.ஏ.பிரபு, மாவட்ட இளைஞரணி துணை அமைப்பாளரும், அரகண்டநல்லூர் பேரூராட்சி மன்ற தலைவருமான வக்கீல் ராயல் எஸ்.அன்பு, ஒன்றிய இளைஞரணி அமைப்பாளர்கள் பாலமுருகன், விமல்ராஜ், அய்யப்பன் மற்றும் நகரமன்ற உறுப்பினர்கள், இளைஞர் அணியினர், நிர்வாகிகள் உள்பட பலர் கலந்து கொண்டனர்.