தரமற்ற விதைகளை வினியோகித்தால் கடும் நடவடிக்கைவிற்பனையாளர்களுக்கு அதிகாரி எச்சரிக்கை

இதுகுறித்து அவர் வெளியிட்டுள்ள ஒரு செய்திக்குறிப்பில் கூறியிருப்பதாவது:-

விழுப்புரம், கள்ளக்குறிச்சி, கடலூர் ஆகிய மாவட்டங்களில் எதிர்வரும் காரீப் பருவத்தில் மானாவாரிப்பட்ட சிறுதானிய பயிர்களான சோளம், கம்பு, மக்காச்சோளம், தீவனச்சோளம் ஆகிய பயிர்களை விவசாயிகள் பெருமளவில் சாகுபடி செய்வார்கள். மானாவாரி பட்டத்தில் விதைப்புக்கு போதுமான மழைப்பொழிவு இருக்கும்பட்சத்தில் விதைகளின் முளைப்புத்திறன் பாதிக்கப்படுவதில்லை. மழைப்பொழிவு சீராக இல்லாத நிலையில் மண்ணில் ஈரப்பதம் குறைவாக இருப்பின் விதைகளின் முளைப்புத்திறன் பாதிக்கப்பட வாய்ப்பு உள்ளது.

எனவே மானாவாரி சாகுபடி நடைபெறும் பகுதிகளில் விற்பனை செய்யப்படும் சோளம், கம்பு, மக்காச்சோளம், தீவனச்சோளம் ஆகிய பயிர் விதைகளில் அதிகபட்ச முளைப்புத்திறன் கொண்ட விதைக்குவியல்களை வினியோகிக்குமாறு விதை வினியோகஸ்தர்கள் மற்றும் விதை விற்பனையாளர்கள் கேட்டுக்கொள்ளப்படுகிறார்கள். விதை வினியோகஸ்தர்கள், விற்பனையாளர்கள், விதை உற்பத்தியாளர்களிடமிருந்து உண்மை நிலை விதைக்குவியல்கள் பெறப்பட்டவுடன் குவியல் வாரியாக பணி விதை மாதிரி எடுத்து அனுப்பி அவற்றின் முளைப்புத்திறனை அறிந்து அவற்றில் அதிகபட்ச முளைப்புத்திறன் கொண்ட விதைக்குவியல்களை மானாவாரிப்பகுதி விவசாயிகளுக்கு வினியோகித்தால் மானாவாரி பருவத்தில் விதைகளின் முளைப்புத்திறன் தொடர்பான பிரச்சினைகளை தவிர்க்கலாம்.

விற்பனையாளர்களுக்கு எச்சரிக்கை

மேலும் அனைத்து விதை விற்பனையாளர்களும், தங்கள் நிறுவனத்தில் விதை இருப்பு மற்றும் விலை விவரப்பட்டியல் பலகை வைத்து பராமரிக்க வேண்டும். விதை கொள்முதல் செய்ததற்கான கொள்முதல் பட்டியல், உண்மை நிலை விதைகளுக்கான பகுப்பாய்வு முடிவு அறிக்கை நகல், பதிவுச்சான்று, இருப்புப்பதிவேடு, விற்பனைப்பட்டியல் ஆகிய சட்டப்பூர்வமான ஆவணங்களை தவறாமல் பராமரிக்க வேண்டும்.

விதை வாங்கும் விவசாயிகளுக்கு உரிய படிவத்தில் விற்பனைப்பட்டியல், விவசாயியின் கையொப்பம் பெற்று வழங்கி நகல் பராமரிக்க வேண்டும். இவ்வாறு ஆவணங்கள் மற்றும் பதிவேடுகள் பராமரிக்காத மற்றும் தரமற்ற விதைகளை வினியோகிக்கும் விதை உற்பத்தியாளர்கள், விற்பனையாளர்கள் மீது உரிய சட்டப்பிரிவுகளின் கீழ் நடவடிக்கை மேற்கொள்ளப்படும் என எச்சரிக்கப்படுகிறது.

இவ்வாறு அந்த செய்திக்குறிப்பில் கூறப்பட்டுள்ளது.