சிதம்பரத்தில் பிளஸ்-2 மாணவிக்கு தாலி கட்டிய மாணவர் கைது -வீடியோவை சமூக வலைத்தளத்தில் பதிவிட்டவரும் சிக்கினார்

சிதம்பரம்

சிதம்பரத்தில் காந்தி சிலை அருகே உள்ள பயணிகள் நிழற்குடையில் வைத்து பிளஸ்-2 மாணவிக்கு, பாலிடெக்னிக் கல்லூரி மாணவர் தாலி கட்டினார். இந்த வீடியோ சமூக வலைத்தளங்களில் வைரலாகி பெரும் பரபரப்பை ஏற்படுத்தியது. இதுதொடர்பாக சிதம்பரம் நகர போலீஸ் சப்-இன்ஸ்பெக்டர் நாகராஜன் மற்றும் குழந்தைகள் நல பாதுகாப்பு அலுவலர்கள், பிளஸ்-2 மாணவி மற்றும் மாணவரிடம், அவர்களது பெற்றோரிடமும் விசாரணை மேற்கொண்டனர்.

இதையடுத்து அந்த மாணவியை கடலூரில் உள்ள காப்பகத்திற்கு நேற்று போலீசார் அனுப்பி வைத்தனர். இதேபோல் மாணவிக்கு தாலி கட்டிய மாணவரை போலீசார் குழந்தைகள் திருமண சட்டத்தின் கீழ் கைது செய்து, கடலூரில் உள்ள சிறுவர் சீர்திருத்த பள்ளியில் அடைத்தனர். இதற்கிடையே மாணவிக்கு, மாணவர் தாலி கட்டும் வீடியோவை சமூக வலைத்தளங்களில் பரப்பிய சிதம்பரம் அருகே கோவிலாம்பட்டி பகுதியை சேர்ந்த பாலாஜி கணேஷ்(வயது 50) என்பவரை போலீசார் கைது செய்து விசாரணை நடத்தி வருகின்றனர்.