நெய்வேலியில் மரத்தில் இருந்து தவறி விழுந்த மாணவர் சாவு

மந்தாரக்குப்பம்,

வடலூர் ஆபத்தானபுரத்தை சேர்ந்தவர் பழனிவேல் மகன் சதீஷ்குமார் (வயது 21). இவர் நெய்வேலியில் உள்ள கலை மற்றும் அறிவியல் கல்லூரியில் பி.பி.ஏ. 2-ம் ஆண்டு படித்து வந்தார். இந்த நிலையில் நெய்வேலி 27-வது வட்டத்தில் இளநீர் பறிப்பதற்காக தென்னை மரத்தில் சதீஷ்குமார் ஏறி உள்ளார். அப்போது அவர் எதிர்பாராதவிதமாக தவறி கீழே விழுந்தார். இதில் பலத்த காயமடைந்த அவர் சம்பவ இடத்திலேயே பரிதாபமாக உயிரிழந்தார். இதுகுறித்த தகவல் அறிந்த தெர்மல் போலீசார் சம்பவ இடத்துக்கு விரைந்து வந்து சதீஷ்குமாரின் உடலை கைப்பற்றி பிரேத பரிசோதனைக்காக விழுப்புரம் முண்டியம்பாக்கம் அரசு மருத்துவக்கல்லூரி மருத்துவமனைக்கு அனுப்பி வைத்தனர். மேலும் இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.